Bıyl Qazaqstanda qansha astyq jınalýy múmkin – AShM esep berdi

NUR-SULTAN. QazAqparat – Qazaqstannyń eksporttyq naryqtardaǵy pozıtsııasyn saqtap turýǵa múmkindik bar. Bul týraly Úkimet otyrysynda QR Aýyl sharýashylyǵy mınıstriniń mindetin atqarýshy Erbol Qarashókeev málim etti, dep habarlaıdy QazAqparat tilshisi.

«Bizdiń aldymyzda álemdik azyq-túlik baǵasynyń ósýi men jalǵasyp jatqan Covid-19 koronavırýs pandemııasy jaǵdaıynda eldiń azyq-túlik qaýipsizdigin qamtamasyz etý boıynsha mańyzdy mindet tur. Oblystar ákimdikteriniń derekteri boıynsha astyqtyń jalpy jınalymynyń boljamdy kólemi 15,3 mln tonna deńgeıinde bolady dep kútilýde. Budan basqa, respýblıkada 3,5 mln. tonna kóleminde aýyspaly astyq qaldyǵy bar», - dedi Erbol Qarashókeev.

Onyń aıtýynsha, Memleket basshysynyń tapsyrmasy aıasynda bıyl Azyq-túlik kelisimshart korporatsııasy aýyl sharýashylyǵy ónimderin forvardtyq satyp alýdy júzege asyrdy, sonyń arqasynda Azyq-túlik kelisimshart korporatsııasynyń resýrstaryna 769,5 myń tonna kóleminde astyq jetkizýge kelisimshart jasaly. Bul rette Azyq-túlik kelisimshart korporatsııasynda 448 myń tonna kóleminde rezervtik astyq qory bar. Kórsetilgen astyq kólemi qajet bolǵan jaǵdaıda, azyq-túlik qaýipsizdigin qamtamasyz etý jáne ony turaqtandyrý úshin ishki naryqqa baǵyttalatyn bolady.

«Aýyspaly qaldyqtardy eskere otyryp, jalpy jınalatyn astyqtyń kútiletin kólemi respýblıkanyń ishki qajettilikterin tolyq qamtamasyz etýge, sondaı-aq astyqtyń belgili bir kólemin eksporttaýǵa jetkilikti. Óndiriletin astyq kólemi eldiń azyq-túlik qaýipsizdigin qamtamasyz etip ǵana qoımaı, Qazaqstannyń eksporttyq naryqtardaǵy pozıtsııasyn saqtap turýǵa da múmkindik beredi», - dedi E. Qarashókeev.