Bıyl Qazaqstanda densaýlyq saqtaý salasynyń 60 nysany qoldanýǵa berildi
ASTANA. QazAqparat - Qazaqstanda 2016 jyldyń sońyna deıin densaýlyq saqtaý salasynyń 60 nysany paıdalanýǵa beriledi, dep habarlady pm.kz.
Onyń ishinde 25 nysan «350 dárigerlik ambýlatorııa, feldsherlik-akýsherlik pýnktter jáne emhanalardyń qurylysy» jobasynyń aıasynda, 35-i jergilikti atqarýshy organdar ótiniminiń negizinde respýblıkalyq jáne jergilikti bıýdjet esebinen salynýda.
Atalǵan jobanyń aıasynda 32 emhana, alǵashqy medıtsınalyq-sanıtarlyq kómek ortalyqtary men 318 dárigerlik ambýlatorııa, feldsherlik-akýsherlik pýnktter qurylysy qarastyrylǵan. 2016 jylǵy 1 qyrkúıektegi málimetterge sáıkes, 325 nysannyń nemese josparlanǵan nysannyń 93%-nyń qurylysy aıaqtaldy.
Qazirgi tańda 8 nysandy paıdalanýǵa berý boıynsha (bir aýysymda 250 adamdy qabyldaıtyn Aqmola oblysy Zerendi aýdany Zerendi aýylyndaǵy emhana, bir aýysymda 25 adamdy qabyldaıtyn Aqmola oblysy Býrabaı aýdany Atameken aýylyndaǵy, bir aýysymda 25 adamdy qabyldaıtyn Qaraǵandy oblysy Buqar jyraý, Osakarovka, Nura men Shet aýdandaryndaǵy 6 dárigerlik ambýlatorııa) qabyldap alý aktilerine qol qoıý sharalary ótkizilýde. Sonymen qatar, 17 nysannyń qurylysyn aıaqtaý men paıdalanýǵa berý jumystary júrgizilýde.
Sonymen birge, qazirgi tańda «350 dárigerlik ambýlatorııa, feldsherlik-akýsherlik pýnktter jáne emhanalar qurylysy» jobasynyń aıasynan bólek jergilikti atqarýshy organdardyń ótinimi negizinde respýblıkalyq jáne jergilikti bıýdjet esebinen densaýlyq saqtaý salasynyń 49 nysanynyń qurylysy júrgizilýde. Onyń ishinde aǵymdaǵy jyly 35 nysan paıdalanýǵa berilse, 2017 jyly 14 nysan berilmek.
Bıyl paıdalanýǵa beriletin medıtsınalyq nysandardyń 5-ýiniń qurylysy aıaqtaldy: Taldyqorǵan qalasyndaǵy 300 oryndyq kópsalaly aýrýhana, Atyraý oblysy Qurmanǵazy aýdany Ganıýshkıno aýylyndaǵy feldsherlik-akýsherlik pýnkt pen Isataı aýdany Janbaı aýylyndaǵy dárigerlik ambýlatorııa, bir aýysymda 300 adamdy qabyldaıtyn Qostanaı qalasyndaǵy oblystyq onkologııalyq dıspanser emhanasy, Ońtústik Qazaqstan oblysy Túlkibas aýdany Túlkibas aýylyndaǵy emhana. Basqa nysandar boıynsha qurylystardy aıaqtaý men paıdalanýǵa berý sharalary júrgizilýde.
