Bıyl Qazaqstanda býnkerlik salmaqta 13,6 mln. tonna astyq jınaldy

Bul týraly búgin Úkimet otyrysynda Aýyl sharýashylyǵy mınıstri Aqylbek Kúrishbaev málim etti.

Ótken 9 aıdyń qorytyndysynda elimizdiń agrarlyq salasynyń turaqty damý qarqynyn saqtaǵandyǵyn atap ótken ol: «Astyqtyń býnkerlik salmaqtaǵy jalpy túsimi 13,6 mln. tonnany qurady. Ótken jyldan qalǵan astyqty esepke alǵanda bul kólem ishki naryqtyń qajettiligin tolyq qanaǵattandyrýǵa ári ortasha jyldyq eksporttyq áleýetti saqtap qalýǵa jetkilikti. Ótken aılardyń ózinde biz naryqtarǵa 2,2 mln. tonna astyq, onyń ishinde 42 paıyzyn un retinde shyǵardyq», - dedi.

A. Kúrishbaevtyń aıtýyna qaraǵanda, aǵymdaǵy jyly maıly daqyldardyń túsimi - 788 myń tonna bolady dep kútilýde. Bul tutynýdyń eń tómen normalaryna sáıkes elimizdiń ósimdik maıymen ózin-ózi qamtamasyz etýge tolyq múmkindik beredi. Al kúrishtiń jalpy túsimi - 415 myń tonnany qurap otyr. Bul da ishki naryqty qamtamasyz etý úshin jetkilikti. «Kartop pen kókónisterdiń de óndiris kólemderi olardy salý jáne saqtaýdy uıymdastyrǵan jaǵdaıda ishki qajettilikter úshin jetkilikti bolady», - dep túıindedi sózin mınıstr.