Bıyl Qazaqstanda balalarǵa qatysty zorlyq-zombylyq jasalǵan 465 fakt anyqtaldy
ASTANA. QazAqparat - Bıyl Qazaqstanda balalarǵa jynystyq sıpattaǵy zorlyq-zombylyq jasalǵan 465 fakt tirkelgen. Bul týraly búgin Ortalyq kommýnıkatsııalar qyzmetinde ótken brıfıng barysynda QR ІІM Ákimshilik polıtsııa komıtetiniń qylmystyń aldyn alý jónindegi basqarma basshysy Alekseı Mılıýk málim etti.
«Resmı statıstıkaǵa súıensek, jyl basynan beri balalarǵa jynystyq sıpattaǵy zorlyq-zombylyq kórsetkenderi úshin 133 qylmystyq is qozǵalǵan, al 16 jasqa tolmaǵan balalardy jynystyq qatynasqa tartqan jáne jynystyq sıpattaǵy basqa da áreketterge qatysty 465 fakt tirkeldi», - deıdi A.Mılıýk.
Quqyq qorǵaýshynyń aıtýynsha, balalardy qorǵaý úshin qolda bar zańnamalarǵa ózgerister engizilip, birqatar jańa zań jobalary qabyldanǵan.
«Ózderińiz bilesizder, sońǵy jyldary balalardyń quqyǵyn qorǵaý baǵytynda, ásirese, osy balalardy zorlyq-zombylyqtan qorǵaý úshin birqatar zań jobalary qabyldandy. Ata-analardyń da jaýapkershiligin arttyratyn sharalar bar. Mysaly, jańa Qylmystyq kodekske saı, óz balasynyń tárbıesine kóńil bólmegen ata-analardy qylmystyq jaýapkershilikke tartýǵa bolady»,-deıdi A.Mılıýk.
Mamannyń pikirinshe, ózge zań jobalarymen qatar, «Turmystyq zorlyq-zombylyqtyń aldyn alý týraly» zań jobasy balalar men jasóspirimderge zábir kórsetetin, kámelet jasyna tolmaǵandarǵa qatysty qylmystar sanyn azaıtqan.
