Bıyl Qazaqstanda balalarǵa qatysty 78 zorlyq-zombylyq oqıǵasy tirkelgen

  ASTANA. QazAqparat - Jyl basynan beri 8 aıdyń ishinde elimizde balalarǵa qatysty 78 zorlyq-zombylyq jaǵdaıy tirkelgen. Bul týraly Úkimettiń baspasóz ortalyǵynda ótip jatqan brıfıng barysynda Parlament Senatynyń depýtaty, Qazaqstannyń Bala quqyqtary jónindegi ýákili Sáýle Aıtpaeva málim etti, dep habarlaıdy QazAqparat tilshisi.

Brıfıng barysynda Sáýle Aıtpaevaǵa balalarǵa qatysty zorlyq-zombylyq jaǵdaıyn aldyn alý úshin qandaı jumystar atqarylyp jatqany týraly suraq qoıyldy.

«Qazir elimizdegi 8 aılyq statıstıka bizdiń barlyǵymyzdyń qolymyzda tur. Oǵan qarasaq, balalarǵa 78 zorlaý jasalǵan. Ol (atalmysh jaǵdaılar - avt.) seksýaldy sıpatta bolǵan. Kishkentaı balalar. Balany óltirý de, balalardyń óz-ózine qol jumsaýy da bar. 124 bala bıyl ómirmen qosh aıtysty. 2008 jylǵy eki bala ózderi qylmys istedi», - deıdi QR Bala quqyqtary jónindegi ýákil.

Onyń aıtýynsha, mundaı jaǵdaıdyń aldyn alý maqsatynda jaýapty organdar tyń jospar ázirleýde.

«Osynyń bárine bir jaýap izdeýimiz kerek. Nege osyndaı bolyp jatyr? Osy rette Іshki ister mınıstrligi, prokýratýra, BǴM barlyǵy birlesip, jospar jasady. Sol josparda jas balalarǵa qalaı júrip, qalaı turýy kerektigi tolyǵymen jazylǵan. Bala men ata-ana zorlyq-zombylyqqa tap bolmas úshin qandaı jumys júrgizý kerek? Quqyq qorǵaý organdary qandaı sharalardy qolǵa alýy tıis? Sony (jospardy -avt.) qaıtadan jańartyp jatyrmyz», - deıdi Sáýle Aıtpaeva.