Bıyl Qazaqstanda astyq ónimi ortasha jyldyq deńgeıden joǵary bolýy yqtımal - Ó. Shókeev
ASTANA. Maýsymnyń 21-i. QazAqparat /Ernur Aqanbaı/ - Bıyl Qazaqstanda astyq ónimi ortasha jyldyq deńgeıden joǵary bolýy yqtımal.
Bul týraly búgin Parlament palatalarynyń birlesken otyrysynda birinshi vıtse-premer Ómirzaq Shókeev aıtty.
«Bıylǵy astyqtyń ónimi aýa-raıyna baılanysty bolady. Qazirgi kúnde elimizde kúnniń aptap ystyǵy ótti, 10 kúndeı aýa temperatýrasy óte joǵary boldy, alaıda sońǵy úsh kúnde kún raıy birqalypqa tústi, jaýyn-shashyn bolyp jatyr. Alaıda, buǵan qarap astyq bolmaıdy dep túıin jasaýǵa bolmaıdy. Eger qazirgideı jaýyn-shashyndy kún raıy birshama ýaqyt saqtalatyn bolsa, onda men bıyl astyq ónimi ortasha jyldyq deńgeıden joǵary bolady dep aıta alamyn. Bul degenimiz ár gektardan 10-11 tsentnerden astyq alynady degen sóz», dedi otyrysta Ó. Shókeev.
