Bıyl Qazaqstanda adam saýdasynyń 28 faktisi tirkeldi

ALMATY. Qarashanyń 26-sy. QazAqparat /Názıra Eleýhan/ - Bıylǵy jyly Qazaqstanda adam saýdasynyń 28 faktisi tirkelgen, onyń 11-i kámelet jasqa tolmaǵandar. Bul kórsetkish basqa Orta Azııa elderimen salystyrǵanda az emes. Eń qaýiptisi, aldymen, áıelder men qyzdar, sonymen qatar  jasóspirimder  adam saýdasynyń qurbany bolýda. Bul týraly keshe óz jumysyn bastaǵan «Ortalyq Azııadaǵy adam saýdasymen kúresýge shaqyrý; múmkindikteri men tendentsııalary» atty Ortalyqazııalyq forýmda  Halyqaralyq  kóshi-qon  uıymynyń ókilderi málim etti,

dep habarlaıdy QazAqparat.

Adam saýdasymen kúres jáne erikti qaıtarý boıynsha departamentiniń ókili Djonatan Martenstiń aıtýynsha, jylyna qul saýdagerleriniń qolyna 600 myńnan 4 mıllıonǵa deıin adam túsedi. Qylmystyq toptardyń jyldyq paıda kiristeri 32 mıllıard dollardy quraıdy.    «Adam saýdasy esirtki saýdasynan keıin tabysy boıynsha ekinshi zańsyz bıznes bolyp otyr. Kóbine mundaı jaǵdaılarǵa jaǵdaıy tómen otbasylar, kámeletke tolmaǵan balalar, sonymen qatar mıgranttar ushyraıdy. Qazaqstan geografııalyq ornalasý jaǵynan Ózbekstan, Qyrǵyzstan, Tájikstan mıgranttaryna qolaıly oryn bolyp otyr. Qazaqstan azamattarynyń kópshiligi arab jáne túrik elderinde adam saýdasynyń qurbandary bolýda», dedi Djonatan Martens. Forým barysynda adam saýdasynyń qurbandaryn qurylystarda, qara bazarlarda, úı qyzmetinde, qaıyr suraýshy men jezókshelikpen aınalysýǵa májbúrleıtindigi atap  ótildi. Adam saýdasy, azamattardy qul retinde paıdalaný, nápsiqumarlyq áreketterine májbúrleý, tipten sonaý órkenıetti delinetin aımaq - Eýropanyń ózinde de mańyzdy máselege aınalyp otyr.

1999 jyldan Halyqaralyq  kóshi-qon  uıymy adam saýdasynyń qurbandaryna ushyraǵan azamattarǵa kómektesip keledi. 2002-2009 jyldar aralyǵynda atalmysh uıymnyń kómegimen 550 qazaqstandyq elimizge qaıtarylǵan.