Bıyl Qazaqstanda 90 mln tonnadan astam munaı óndiriledi

NUR-SULTAN. QazAqparat – 2019 jyly Qazaqstanda 90,4 mln tonna munaı óndiriledi. Bul týraly Energetıka vıtse-mınıstri Áset Maǵaýov málimdedi, dep habarlaıdy QazAqparat tilshisi.

«Aldyn ala qorytyndy boıynsha, bıyl shamamen 90,4 mln tonna munaı óndiriledi. Osylaısha 2018 jylǵy rekordty (90,36 mln tonna) qaıtalaımyz. Munaı salasy úshin mundaı óndirý deńgeıin saqtaý – jaqsy jetistik. Bul rette bıyl úsh iri jobada: Teńiz ben Qarashyǵanaqta kúrdeli jóndeý, al Qashaǵanda alǵash ret kúrdeli jóndeý jumystary bolǵanyn eskergen jón. Biraq, jóndeý kezinde negizgi óndiris toqtaǵanyna qaramastan, óndirý deńgeıin qalpyna keltirip, ulǵaıta aldyq», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.

Onyń aıtýynsha, 2017 jyldan bastap jyl saıyn oń dınamıka baıqalyp keledi. 2016 jyldyń sońynda Qashaǵandy iske qosqan soń, munaı óndirý isi jańa deńgeıge shyqty. Bir jyldyq óndirý 2017 jyly 8 mln tonnaǵa ósip, 86,2 mln tonnany qurady. Al 2018 jyly óndirý deńgeıi 4 mln tonnaǵa ósip, 90,36 mln tonna boldy.