Bıyl Qazaqstanda 800-den asa eldi mekendi sý basýy yqtımal - TJK
ASTANA. QazAqparat - Bıyl Qazaqstanda 800 eldi mekende sý deńgeıi kóterilýi múmkin. Bul týraly búgin Ortalyq kommýnıkatsııalar qyzmetindegi baspasóz máslıhatynda QR ІІM Tótenshe jaǵdaılar komıtetiniń tóraǵasy Vladımır Bekker málim etti.
«Bekitilgen josparǵa sáıkes, sý basýy múmkin aýmaqtar aıqyndaldy. Kóktemgi kezeńde elimiz boıynsha 807 eldi mekendi sý basýy yqtımal. Osy turǵyda 1 mln. 250 myń adam turatyn aımaqtar qamtylýy múmkin. Bul josaprǵa sáıkes, táýekeldi aımaqtar aıqyndaldy», - dedi komıtet basshysy.
Onyń sózine qaraǵanda, búginde jergilikti atqarýshy organdar qaýipsiz jerge kóshirý oryndaryn daıarlap qoıdy.
Aıta keteıik, barlyq deńgeıdegi ákimdikter tótenshe jaǵdaılardyń aldyn alý jáne joıý jónindegi komıssııanyń 276 otyrysyn ótkizdi. Sondyqtan da ótken jyldaǵy jaǵdaı qaıtalanbaıtyn bolady.
Budan buryn habarlanǵandaı, elimiz boıynsha Qazgıdromettiń aldyn ala boljamyna toqtalatyn bolsaq, ásirese, Aqmola, Aqtóbe, Qostanaı, Qaraǵandy jáne Soltústik Qazaqstan oblystarynda bıyl kóktemde qar sýynyń eleýli kólemi boljanyp otyr.
Sonymen qatar tasqyn sýǵa qatysty qaýip Shyǵys Qazaqstan jáne Almaty oblystarynda da bolýy yqtımal. Sebebi, ózen basseıinderi men Jetisý jáne Іle Alataýy jotalarynda jınalǵan qardyń deńgeıi ótken jylǵa qaraǵanda 1,5 esege artyq bolyp otyr.
Kún kúrt jylynǵan jaǵdaıda sý basý basý qaýpi Qaraǵandy, Aqmola, Soltústik Qazaqstan oblystaryndaǵy Esil, Nura, Sarysý jaǵasynda ornalasqan eldi mekenderinde týyndaýy múmkin.
