Bıyl Qazaqstanda 7 ońaltý ortalyǵy ashylady
Oqý-aǵartý mınıstrliginiń málimetinshe, olar balalarǵa áleýmettik medıtsınalyq-pedagogıkalyq jáne túzetý arqyly qoldaý kórsetýge qajettilik bar óńirlerde qurylady.
Búgingi kúni elimizde 88 psıhologııalyq-medıtsınalyq-pedagogıkalyq konsýltatsııa, 211 psıhologııalyq-pedagogıkalyq túzetý kabıneti, 14 ońaltý ortalyǵy jáne 213 arnaıy bilim berý uıymy jumys isteıdi.
«PMPK, túzetý kabınetteriniń sany jyl saıyn artyp keledi. Oqý-aǵartý mınıstrligi bul jumysty baqylaýda ustap otyr. Byltyr Qaraǵandy, Aqtaý qalalarynda, Mańǵystaý oblysynyń Beıneý aýdanynda, Almaty oblysynyń aýyldarynda jáne Qapshaǵaı qalasynda psıhologııalyq-medıtsınalyq-pedagogıkalyq konsýltatsııalar ashyldy. Mınıstrlik 2025 jylǵa deıin PMPK jelisin 50 000 balaǵa 1 PMPK esebinen 125-ke deıin keńeıtýdi josparlap otyr. Túzetý kabınetteri men ońaltý ortalyqtarynyń sany da artyp keledi. 2021 jyly 13 túzetý kabıneti ashyldy. Osylaısha, balalardy arnaıy psıhologııalyq-pedagogıkalyq qoldaý aıtarlyqtaı keńeıip keledi, bul balalar múgedektiginiń aldyn alýǵa jáne azaıtýǵa yqpal etedi», - dep túsindirdi Oqý-aǵartý mınıstrligi Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń dırektory Áıgerim Kúderınova.
Sonymen qatar elimizde arnaıy bilim berý uıymdarynyń sany da aıtarlyqtaı ósti. Balalar jylynda Taraz, Oral jáne Qaraǵandy qalalarynda aýtızmi bar balalarǵa arnalǵan 3 qoldaý ortalyǵy ashyldy. Erekshe balalarmen tájirıbeli mamandar jumys isteıdi. Ońaltý jáne psıhologııalyq-pedagogıkalyq túzetý qyzmetteri memlekettik qyzmet bolyp esepteledi jáne ol tegin kórsetiledi.
