Bıyl Qazaqstanda 600 shaqyrym jol paıdalanýǵa beriledi

ASTANA. QazAqparat - QR Ulttyq ekonomıka mınıstri Tımýr Súleımenov Úkimet otyrysynda «Nurly jol» memlekettik baǵdarlamasy boıynsha ústimizdegi jylǵy 9 aıynyń qorytyndysy týraly baıandady, dep habarlaıdy QazAqparat.

«Nurly jol» memlekettik baǵdarlamasynyń júzege asyrylýyna 2017 jyly 484,2 mlrd teńge bólingen, onyń 2017 jylǵy 1 qazanǵa 313,7 mlrd teńgesi nemese qarjylandyrýdyń jyldyq josparynyń 65% ıgerildi», - dedi Súleımenov. 

Belgili bolǵandaı, respýblıkalyq mańyzdaǵy 22 negizgi avtojol jobalaryn júzege asyrýǵa aǵymdaǵy jyly 259,8 mlrd teńge kózdelgen, onyń ishinde qarjylandyrý jospary boıynsha 2017 jylǵy 1 qazanǵa 150,4 mlrd teńge bólinip, ol tolyq kólemde ıgerildi (qarjylandyrýdyń jyldyq josparynyń 57 paıyzy). Sonymen qatar, qosymsha halyqaralyq qarjy uıymdarynan 96,4 mlrd teńge qaryz tartylǵan, onyń bul kúni 27 mlrd teńgesi ıgerildi. Jalpy aǵymdaǵy jyly 602 shaqyrym paıdalanýǵa beriletin bolady.

Budan bólek, logıstıkalyq ınfraqurylymdy damytý úshin 2017 jyly 55 mlrd teńge kózdelgen.

«Quryq portyndaǵy paromdyq keshen 2- fazasynyń qurylysyna 50 mlrd teńge kózdelgen, onyń ishinde bıylǵy 1 qazandaǵy jaǵdaı boıynsha «QTJ» AQ 33,4 mlrd teńge ıgerildi. Jumys qurylys-montajdaý jumystarynyń jumys kestesine sáıkes júrgizilýde. Jyldyń sońyna deıin qarajat tolyq kólemde ıgeriletin bolady»,-dep túsindirdi mınıstr.

Onyń sózine qaraǵanda,  Astana qalasy halyqaralyq áýejaıynyń jolaýshylar termınalynyń qosymsha ınfraqurylymynyń qurylysyna 2017 jyly UQ qarajatynan 5 mlrd teńge bólindi.

«3,5 mlrd teńge sommada tólemder «Astana halyqaralyq áýejaıy» AQ shotyna aýdarylyp tolyq kólemde ıgerildi. Qalǵan 1,5 mlrd teńge kólemindegi qarajat QR Qarjy mınnıstrliginiń ishki memlekettik aýdıt komıtetiniń nusqamasyna sáıkes, memlekettik bıýdjetke qaıtarylýy tıis»,-dedi Súleımenov.