Bıyl Qazaqstanda 4 túrme jabylady - ІІM
NUR-SULTAN. QazAqparat – Bıyl Qazaqstanda 4 túrmeni jabý josparlanǵan. Oǵan sońǵy 8 jylda eldegi sottalǵandardyń sany 50 paıyzǵa azaıýy sebep bolǵan, dep habarlaıdy QazAqparat tilshisi.
Іshki ister mınıstri Erlan Turǵymbaevtyń aıtýynsha, 2000 jyly Qazaqstan halyqaralyq túrme reıtıngi boıynsha 3-orynda turǵan. 19 jyldyń ishinde sottalǵandardy qamtamasyz etýge qolaısyz dep tanylǵan 8 túrme jabylyp, 2019 jylǵy reıtıng boıynsha 95-orynǵa túsken.
«Osy jyly 4 túrmeni jabý josparlanyp otyr. Sottalǵandardy jeke kameralarǵa aýystyrý jumystary júrip jatyr. Sońǵy jyldary Qyzylordadaǵy kolonııa men Almatydaǵy tintý ızolıatory, sonymen qatar Oraldaǵy eki kolonııa men Almaty oblysyndaǵy bir kolonııa jańadan qalpyna keltirildi. Qamalǵandar men sottalǵandardyń qaýipsizdigi úshin mekemelerdiń barlyq jerine beınekamera ornatý bastaldy» - deıdi mınıstr.
Ol sondaı-aq, qylmystyq atqarý júıesi men probatsııa qyzmetkerleri de beınetaspamen qamtamasyz etiletinin atady.
«Sottalǵandardyń ótinishterin elektrondy túrde joldaý jolǵa qoıylmaq. Bul úshin mekemede tıisti termınaldar ornatylady. Mekeme qyzmetkerlerin beınetirkegishtermen jabdyqtaýdy josparlap otyrmyz. Bizdiń bastamamyz boıynsha, sottalǵandardy medıtsınalyq kómekpen qamtamasyz etý isi Densaýlyq saqtaý mınıstrliginiń qaramaǵyna berilýi múmkin. Almaty jáne Qaraǵandy oblystarynda osy másele boıynsha ilkimdi joba qolǵa alyndy. Sottalǵandardyń eń qajet taýarlardy elektrondy dúkenderden satyp alýyna, týystarymen beıne suhbattasýyna múmkindik beretin birneshe tsıfrlyq joba ázirlenip jatyr. Alǵashqy joba Aqmola oblysynda iske qosyldy» - dedi Erlan Turǵymbaev.
Eske salsaq, búgin elordada qylmystyq atqarý júıesin reformalaý máselesin arnalǵan ashyq dıalog formatyndaǵy forým ótip jatyr. Shara barysynda QR bas prokýrorynyń orynbasary Marat Ahmetjanov eldegi túrmelerdiń 80 paıyzdan astamy eskirgenin aıtqan bolatyn.
