Bıyl Qazaqstanda 4 aıdyń ishinde 21 myń kıberqylmys tirkeldi – depýtat

NUR-SULTAN. QazAqparat – 2022 jyldyń 4 aıynyń qorytyndysy boıynsha elimizde 21 myń kıberqylmys tirkelgen. Salystyryp qarasaq, 2019 jyldyń qorytyndysy boıynsha 7 myń atalǵan qylmys túri bolǵan. Bul máseleni QR Parlamenti Senatynyń depýtaty Nurlan Beknazarov kóterip otyr, dep habarlaıdy QazAqparat tilshisi.

«Tsıfrlandyrý damyp jatyr dep qýanamyz. Bul oń úrdis. Degenmen onyń keri jaǵy baryn da umytpaǵan jón. Onyń zardabyn jastar da tartyp jatyr. Mysaly, tsıfrlandyrýdyń arqasynda qarjy pıramıdalary paıda bolyp jatyr, bireýdiń atynan nesıe rásimdeý, ınternet alaıaqtyq, býkmekerlik bás tigýler, býllıng, kıberbýllıng dep kete beredi. Sonyń ishinde kıberqylmysqa jeke toqtalsam. Statıstıkaǵa súıensek, bıylǵy jyldyń 4 aıynda elimizde 21 myń kıberqylmys tirkelgen. Al 2019 jyldyń qorytyndysynda 7 myń kıberqylmys bolǵan. Sonda bıyl 4 aıda 2019 jylmen salystyrǵanda kıberqylmystyń deńgeıi 3-4 esege ósip otyr», - dedi Nurlan Beknazarov elordadaǵy Eýrazııa ulttyq ýnıversıtetiniń jurtshylyǵymen kezdesý barysynda.

Onyń aıtýynsha, kıberqylmystyń ósýiniń negizgi sebebi – ınternet.

«Kıberqylmyspen aınalysýshy kimder degen kelsek. Olar zeınetkerler emes, memlekettik qyzmetkerler emes, depýtattar emes – ol bizdiń jastar. Osy máselesi bizdi qatty tolǵandyryp otyr. Úkimet jastardyń bilimmen, jumyspen qamtýǵa birqatar shara atqaryp jatyr. Endigi ýaqytta jastar jaǵynan da umtylys bolýy kerek. Árıne, men búkil jasty qaralaýdan aýlaqpyn. Degenmen joǵarydaǵy statıstıkaǵa sáıkes, kıberqylmysqa baratyndardyń deni jastar», - deıdi ol.

Buǵan deıin Senat depýtaty jastarǵa 5 maýsymda ótetin referendýmnyń máni men mańyzyn túsindirip bergen edi.