Bıyl Qazaqstanda 26 jańa kókónis qoımasy ashylady

ASTANA. QazAqparat - 2023 jyly Qazaqstanda jalpy qýaty 104,5 myń tonna bolatyn 26 jańa kókónis qoımasy ashylady, al 2026 jylǵa deıin elde taǵy 35 zamanaýı qoıma paıdalanýǵa beriledi. Olar respýblıkadaǵy syıymdylyǵy 1,9 mln tonna 1208 saqtaý obektisiniń tizimine kiredi, dep habarlaıdy QazAqparat AShM saıtyna silteme jasap.

Sońǵy jyldary Qazaqstanda kókónis qoımalarynyń tapshylyǵy ótkir boldy, ásirese, másele maýsymaralyq kezeńde seziletin.

Sondyqtan elimizde saqtaý obektilerin salý jáne jańǵyrtý jónindegi keshendi jospar ázirlendi, ol keminde kólemi 335,6 myń tonna bolatyn 97 jemis-kókónis ónimderiniń qoımasyn salýdy kózdeıdi.

Jumys jospardaǵy kórsetkishterden asyp júrgizilip jatyr.

Mysaly, 2021-2022 jyldary 181,5 myń tonnaǵa 36 qoıma salý josparlanǵan bolatyn, is júzinde 200,8 myń tonnaǵa deıin ónim qabyldaýǵa qabiletti 37 kókónis qoımasy ashyldy.

Kókónis ónimdiliginiń kórsetkishteri ósip jatqanyn eskere otyryp, Qazaqstan úshin qoldanystaǵy kókónis qoımalaryn saqtaý ınfraqurylymyn keńeıtý jáne jańǵyrtý máselesi ózekti bolyp otyr.

2022 jyly otandyq fermerler 4,1 mln tonna kartop, 621,4 myń tonna sábiz, 1,1 mln tonna pııaz jáne 552 myń tonnaǵa jýyq qyryqqabat jınady.

Olardy saqtaý úshin ınfraqurylym salý aýyl turǵyndarynyń qol jetimsiz kiristerin toltyrýǵa, ımportqa táýeldilikti tómendetýge, sondaı-aq maýsymaralyq kezeńde túpkilikti tutynýshy úshin azyq-túlik baǵasyn turaqtandyrýǵa kómektesedi.

Josparda qoıma salýǵa jáne jańǵyrtýǵa ınvestıtsııa tartý úshin ónimniń taýarlyq qasıetterin saqtaı otyryp, onyń uzaq merzimdi saqtalýyn qamtamasyz etetin arnaıy jabdyǵy bar qazirgi zamanǵy qoımalardy salý kezinde ınvestıtsııalyq sýbsıdııalaý normatıvin 25%-dan 40-50%-ǵa deıin ulǵaıtý kózdeledi.

Qazaqstannyń Aýyl sharýashylyǵy mınıstrligi Pavlodar oblysyndaǵy zamanaýı kókónis qoımalarynyń birine baspasóz týryn uıymdastyrdy.

Nysan Grıgorev aýyldyq okrýginde 2019 jyly paıdalanýǵa berilgen.

Kásipker jobaǵa 820 mln teńge ınvestıtsııa saldy, onyń 200 mln teńgesin oǵan memleket ótedi.

Qýaty 19 myń tonna kókónis qoımasy kásipkerdiń óz ónimin de, jaqyn mańdaǵy aýdandardyń sharýa qojalyqtarynyń ónimin de saqtaýǵa múmkindik berip otyr.

Aıta keteıik, aýyl sharýashylyǵy basqarmasynyń málimetinshe, Pavlodar oblysynda jalpy syıymdylyǵy 460,6 myń tonna bolatyn 146 kókónis qoımasy bar.

2022 jyly oblysta 11 jańa saqtaý nysany iske qosyldy, bıyl qýattylyǵy 72,5 myń tonna bolatyn taǵy 6 kókónis qoımasy salynady.