Bıyl Qazaqstanda 120 mln tonna kómir óndirilmek
NUR-SULTAN. QazAqparat - Bıyl Qazaqstanda 120 mln tonna kómir óndirý josparlanǵan. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.
Usynylǵan aqparatqa súıensek, elimizde aǵymdaǵy jyldyń qańtar-aqpan aılarynda barlyǵy 18,3 mln tonna kómir óndirdi. Energııa óndirýshi kásiporyndarǵa 10,4 mln tonna kómir jóneltilse, ónerkásiptik kásiporyndarǵa 936,8 myń tonnasy jetkizildi. Al, kommýnaldyq-turmystyq qajettilikter men halyqqa 1,4 mln tonna bólingen. Taǵy 4,6 mln tonnasy eksporttalǵan.
Kommýnaldyq-turmystyq qajettilikter men halyqtyń tutynýyna arnalǵan kómirdiń kómir óndirýshi kásiporynnyń jóneltý baǵasynan (tonnasy 3-6 myń teńge aralyǵynda), tasymaldaýǵa ketken temirjol tarıfterinen, jyljymaly quramdy kútip-ustaý, kómirdiń bırjalyq qunynan, sondaı-aq halyqqa jetkizetin deldaldyq uıymdardyń jáne jeke tulǵalardyń marjasynan qalyptasady.
«Elimizde kómir ónerkásibin damytý maqsatynda ótken jyly «Qazaqstan Respýblıkasynyń kómir salasyn damytý jónindegi 2019-2021 jyldarǵa arnalǵan Jol kartasy« bekitildi. Sondaı-aq «2019-2020 jyldarǵa arnalǵan kommýnaldyq-turmystyq qajettilikter men halyqqa arnalǵan kómir ónimderine qajettilik jospary« jasaldy. 2020 jylǵy 20 naýryzdaǵy jaǵdaı boıynsha jyldyq josparǵa (2019 jylǵy 1 mamyrdan bastap 2020 jylǵy sáýirge deıin) sáıkes kómir qorymen qamtamasyz etý 99,7% quraıdy», - delingen mınıstrlik aqparatynda.
Kommýnaldyq-turmystyq sektor úshin kómirdiń jyldyq jetkizý kestesin Aqtóbe, Shyǵys Qazaqstan, Jambyl, Batys Qazaqstan, Qaraǵandy, Qostanaı, Qyzylorda, Pavlodar, Almaty oblystary, Almaty jáne Shymkent qalalarynyń ákimdikteri tolyǵymen jasap shyqqan.
Sondaı-aq halyq úshin kómirdiń jyldyq jetkizý kestesi, Batys Qazaqstan, Qyzylorda, Qostanaı, Pavlodar, Aqmola, Almaty, Jambyl, Shyǵys Qazaqtan, Soltústik Qazaqstan oblystarynyń jáne Shymkent, Almaty jáne Nur-Sultan qalalarynyń ákimdikterinde daıyn tur.
«Aıta ketý kerek , Qazaqstanda 2020 jyly 120 mln tonna kómir óndirý josparlanǵan. Osylaısha eldiń ishki naryǵyna 82 mln tonna, eksportqa 38 mln tonna kómir jetkiziletin bolady», - dedi vedomstvodan .
