Bıyl Qazaqstanda 1,8 myń shaqyrymǵa jýyq gaz jelisi tartyldy
NUR-SULTAN. QazAqparat - Ulttyq joba aıasynda otandyq energetıka jáne munaı-gaz-hımııa salasyna úlken mán berilgen. Sonymen qatar atalǵan sala ekonomıkany jańǵyrtýdyń mańyzdy baǵyttarynyń biri. Bul týraly QR Premer-Mınıstri Asqar Mamın málim etti, dep habarlaıdy QazAqparat tilshisi.
«Qazaqstandyqtardyń ál-aýqatyn arttyrýǵa baǵyttalǵan ornyqty ekonomıkalyq ósý» ulttyq jobasy aıasynda energetıka jáne munaı-gaz-hımııa salalaryna úlken mán berilgen. Osy jyldyń qorytyndysy boıynsha elde munaı óndirý kólemi 85,7 mln tonnany quraıdy. Salany odan ári damytý úshin qazirgi kezde Teńiz, Qashaǵan jáne Qarashyǵanaq ken oryndarynda aýqymdy jobalar iske asyrylyp jatyr. Aldaǵy ýaqytta Qalamqas teńiz jáne Hazar teńiz jobalaryn ıgerý josparlanǵan. Bul jobalardyń jalpy quny 51 mlrd dollardan asady», - dedi Asqar Mamın Úkimet otyrysynda.
Sondaı-aq, Úkimet basshysy eldi gazdandyrý boıynsha jumystyń qarqyndy júrip jatqanyn aıtty.
«Bıyl shamamen 52 mlrd teńgege 140-tan astam joba iske asyryldy, 1,8 myń shaqyrymǵa jýyq gaz jelisi tartyldy. Osyǵan oraı qazirgi ýaqytta halyqtyń gazben qamtamasyz etilýi 10 mln adamnan asady. Bul jumys jalǵasady. Munaı-gaz óndirisin damytý ekonomıkany jańǵyrtýdyń mańyzdy baǵyttarynyń biri. 2021 jyldyń qorytyndysy boıynsha munaı-gaz hımııasy ónimin óndirý kólemi 190 myń tonnany quraıdy», - deıdi ol.
