Bıyl Qazaqstanda 1,2 trln teńgege 12 myń jumys orny qurylady

NUR-SULTAN. QazAqparat – Bıyl ındýstrııalandyrý kartasynyń aıasynda 1,23 trln teńgeniń 128 jobasy qolǵa alynyp, 12 myń jumys orny ashylady.

Bul týraly QR Indýstrııa jáne ınfraqurylymdyq damý vıtse-mınıstri Marat Qarabaev ortalyq kommýnıkatsııalar qyzmetinde ótken brıfıngide aıtty, dep habarlaıdy QazAqparat tilshisi.

«Bıyl Indýstrııalandyrý kartasynyń aıasynda elimiz boıynsha jalpy somasy 1,23 trln teńgeni quraıtyn 128 jobany iske qosý josparlanyp otyr. Óndiris oshaqtarynda 12 myń jańa turaqty jumys ornyn qurý kózdelgen. Jobalardyń basym bóligi Qaraǵandy jáne Shyǵys Qazaqstan oblystarynda, Shymkent qalasynda ornalasqan.

Qazirgi ýaqytta jalpy somasy 296 mlrd. teńgege 28 joba paıdalanýǵa berildi, 3,5 myńnan astam turaqty jumys orny quryldy», - degen vıtse-mınıstr solardyń ishindegi iri degenderine toqtaldy.

«Birinshi joba – Qaraǵandy oblysyndaǵy «Jáırem ken baıytý kombınaty». Kásiporyndy jańǵyrtý qorǵasyn-myrysh kenin óndirý kólemin 2,5 ese, ıaǵnı jylyna 5 mln tonnaǵa deıin ulǵaıtýǵa múmkindik beredi.

Ekinshi joba – «Petropavl elektrotehnıkalyq zaýyty» JShS-ndegi transformatorlar óndirisi. Bul «Alageým» tobynyń 4-shi iri zaýyty. Atalmysh kásiporyndy iske qosý otandyq transformatorlar óndirisin 40% ulǵaıtyp, qýatyn jylyna 44 myńǵa deıin jetkizedi. Al, eksport jylyna 15 myń birlikten 25 myń birlikke jetedi», - dedi Marat Qarabaev.