Bıyl Qazaqstanda 1 118 traktor jáne 736 kombaın qurastyryldy
NUR-SULTAN. QazAqparat – Bıylǵy 8 aıda otandyq kásiporyndar 1 118 traktor jáne 736 kombaın qurastyrdy, dep habarlaıdy QazAqparat.
«Qazaqstanda aýyl sharýashylyǵy mashınasyn jasaý óndirisiniń kólemi 2019 jyldyń qorytyndysynda 122,4 mlrd teńgeni qurap, 1849 traktor men 791 kombaın shyǵarylǵan edi. Bıylǵy 8 aıdyń qorytyndysynda otandyq kásiporyndar 20,3 mlrd teńgege 1 118 traktor jáne 34,7 mlrd teńgege 736 kombaın qurastyrdy. Bul ótken jyldyń sáıkes kezeńimen salystyrǵanda 2 ese artyq», - delingen Indýstrııa jáne ınfraqurylymdyq damý mınıstrliginiń málimetinde.
Atalǵan vedomstvo otandyq óndiristiń aýyl sharýashylyǵy tehnıkasyn satyp alýdy yntalandyrý maqsatynda traktorlar men kombaındarǵa jeńildikti lızıng baǵdarlamasyn iske asyrýda. Baǵdarlamanyń negizgi sharttary boıynsha tehnıka qunynyń 15% bastapqy jarnasymen 7 jylǵa 7%-ben lızıng alýshyǵa qarjylandyrý usynylady. 2018 jyly bul maqsatqa respýblıkalyq bıýdjetten 3 mlrd teńge, 2019 jyly 3,5 mlrd teńge jáne 2020 jyly 6,5 mlrd teńge bólindi.
Salany ári qaraı qoldaý maqsatynda jeńildikti lızıng baǵdarlamasy aıasynda «QDB-Lızıng» AQ arqyly traktorlar men kombaındarǵa 2021-2025 jyldarǵa 13,5 mlrd teńge mólsherinde qosymsha qarajat bólý usynylyp otyr.
