Bıyl Qazaqstan Tájikstannyń negizgi saýda seriktesine aınalýy múmkin - Emomalı Rahmon

ASTANA. QazAqparat – Bıyl Qazaqstan Tájikstannyń negizgi saýda seriktesine aınalýy múmkin. Tájikstan Prezıdenti Emomalı Rahmonov Memleket basshysy Qasym-Jomart Toqaevpen Aqordada ótken keńeıtilgen quramdaǵy kelissóz kezinde osyndaı boljam aıtty, dep habarlaıdy QazAqparat tilshisi.

«Dıplomatııalyq qatynastardyń otyz jylynda áriptestiktiń barlyq salalarynda eleýli jetistikke jetkenimiz qýantady. Bul protsestiń damýyna eki arada únemi júrip jatqan saıası dıalog sózsiz yqpal etedi. Bul aralyqta memleketaralyq ózara árkettestik qatynastyń qajetti tetikteri men salmaqty quqyqtyq bazasy qalyptasty. Búgin sol bazany jańa qujattarmen tolyqtyramyz», - dedi Tájikstan basshysy.

Sondaı-aq, Emomolı Rahmon eki aradaǵy saýda-ekonomıkalyq áriptestikke toqtaldy.

«Qazaqstan Tájikstannyń syrtqy saýda qurylymynda talaıdan beri jetekshi oryndy ustap tur. Sizdiń Tájikstanǵa jasaǵan resmı saparyńyz kezinde ózińizben jyl saıynǵy taýar aınalymynyń kólemin 2 mlrd dollarǵa deıin jetkizýge kelisken bolatynbyz. Sol atalǵan mindetter josparǵa saı iske asyp jatqany qýantady. Qazaqstan búginde Tájikstannyń sýda seriktesteriniń arasynda eknshi orynda tur. 2023 jyldyń qorytyndysy boıynsha osy kórsetkish boıynsha birinshi orynǵa shyǵýy múmkin. Oǵan orasan múmkindikter bar», - dedi Tájikstan Prezıdenti.

Buǵan deıin habarlaǵanymyzdaı, Aqordada Qazaqstan Respýblıkasynyń Prezıdenti Qasym-Jomart Toqaev pen Tájikstan Prezıdenti Emomalı Rahmonnyń kezdesýi bastaldy.

Keshe Prezıdent Qasym-Jomart Toqaev Qazaqstanǵa memlekettik saparmen kelgen Tájikstan Prezıdenti Emomalı Rahmondy elorda áýejaıynda qarsy alǵan bolatyn.

Al, 3 mamyrda Qazaqstan-Tájikstan bıznes-forýmynda birqatar mańyzdy qujatqa qol qoıyldy.