Bıyl Qazaqstan men Ózbekstan arasyndaǵy taýar aınalymy 2 mlrd AQSh dollaryna jýyqtady
NUR-SULTAN. QazAqparat – Bıylǵy 6 aı ishinde Qazaqstan men Ózbekstan eli arasyndaǵy taýar aınalymy 1,9 mlrd AQSh dollarǵa jetti. Bul týraly Ózbekstan Respýblıkasynyń Qazaqstandaǵy Tótenshe jáne Ókiletti elshisi Saıdıkram Nııazhodjaev málim etti, dep habarlaıdy QazAqparat tilshisi.
«Eki el Úkimeti qabyldaǵan ózara kelisimniń nátıjesinde ekijaqty taýar aınalymy qarqyny artyp keledi. Buǵan deıin Ózbekstan men Qazaqstan arasyndaǵy taýar aınalymy turaqty deńgeıde boldy. Atap aıtar bolsaq, ótken jyly eki el arasyndaǵy taýar aınalymy 3 mlrd-tan astam AQSh dollaryn qurady. Bıyl 6 aıdyń ishinde eki el arasyndaǵy taýar aınalymy 1,9 mlrd AQSh dollaryn qurap otyr. Bul ótken jylmen salystyrǵanda 41,3%-ǵa joǵary. Qazirgi ýaqytta Ózbekstan respýblıkasy aýmaǵynda Qazaqstan kapıtalynyń qatysýymen 858 ónerkásip jumys istep tur. Onyń ishinde 431 ónerkásip ekijaqty kapıtal (50/50) kómegimen jumys istep tur jáne 427 ónerkásip taza qazaqstandyq kapıtaldyń esebinen óndirisin jalǵastyryp jatyr», - dedi Saıdıkram Nııazhodjaev elordadaǵy Ózbekstan elshiliginde ótken baspasóz máslıhatynda.
Ózbek elshisiniń málimetine súıensek, atalǵan elde aktsıonerlik qoǵam úlesi boıynsha qazaqstandyq ónerkásipter alǵashqy orynda tur.
Buǵan deıin Ózbekstan elshisi S. Nııazhodjaev eki el aýmaǵynda birlesken farmatsevtıkalyq ónerkásip ashý týraly sóz qozǵady.
