Bıyl Qazaqstan men Eýroodaq arasyndaǵy taýar aınalymy 43% artty – QR Prezıdenti
ASTANA. QazAqparat – Bıylǵy 8 aıda Qazaqstan men Eýropalyq odaq elderi arasyndaǵy taýar aınalymy 43 paıyzǵa artty. Bul týraly búgin Aqordada Eýropalyq keńestiń prezıdenti Sharl Mıshelmen kelissózderden keıingi baspasózge arnalǵan málimdeme barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Qazirgi tańda Eýropalyq odaq Qazaqstannyń eń iri saýda jáne ınvestıtsııalyq seriktesteriniń biri. 30 jyl ishinde Qazaqstanǵa Eýropadan tartylǵan ınvestıtsııa kólemi 160 mlrd dollardan asty. Bıylǵy 8 aıda Qazaqstan men Eýropalyq odaq elderi arasyndaǵy taýar aınalymy 43 paıyzǵa artyp, 26 mlrd dollar boldy», - dedi Qasym-Jomart Toqaev.
Memleket basshysy Prezıdent Sharl Mıshelmen pikir almasý kezinde energetıka, jasyl ekonomıka, aýyl sharýashylyǵy, kólik jáne logıstıka salalaryndaǵy yqpaldastyqqa oń baǵa bergendikterin atap ótti.
«Ózara tıimdi is-áreketimizdi odan ary kúsheıtý úshin birlese kúsh-jiger jumyldyrýǵa kelistik. Ásirese, asa mańyzdy shıkizatty tasymaldaý jáne jasyl sýtegi energetıkasyn damytý máselesinde mol múmkindigimiz bar», - dedi QR Prezıdenti.
