Bıyl Qazaqstan-Lıtva arasyndaǵy saýda aınalymy 500 mln dollardan asqan

ASTANA. QazAqparat – Jyldyń 9 aıynyń qorytyndysy boıynsha, Qazaqstan men Lıtva arasyndaǵy saýda aınalymynyń kólemi 500 mln dollardan asqan, dep habarlaıdy QazAqparat tilshisi.

QR Premer-Mınıstriniń orynbasary – Syrtqy ister mınıstri Muhtar Tileýberdi Lıtva Syrtqy ister mınıstri Gabrıelıýs Landsbergıspen ótken kelissózdiń qorytyndysy týraly BAQ aldynda jasaǵan málimdemesinde osyndaı sandar keltirdi.

«Dástúrli logıstıkalyq tizbekterdiń buzylýyna qaramastan, 2022 jyldyń 9 aıynda elderimiz arasyndaǵy taýar aınalymy 2,1 ese ósip, 500,4 mıllıon AQSh dollar quraǵanyn atap ótý qýantady», - dedi Muhtar Tileýberdi.

Aıta ketý kerek, 2021 jyldyń 9 aıynda bul kórsetkish 242,4 mln dollar kóleminde ǵana bolǵan.

«Búginde Qazaqstan naryǵynda 170-ke jýyq lıtvalyq kompanııa bar. Óz kezeginde Lıtvada Qazaqstannyń qatysýymen ondaǵan kompanııalar jumys isteıdi. Ushqyshtardy daıarlaý, elektronıka jáne medıtsınalyq jabdyqtar óndirý, paıdalanylǵan motor maılaryn qaıta óńdeý jáne basqa da salalarda birlesken ınvestıtsııalyq jobalar iske asyrylýda», - dedi Syrtqy ister mınıstri.