Bıyl Qazaqstan keminde 9 mln tonna astyq eksporttaıdy
ASTANA. QazAqparat - Bıyl Qazaqstan keminde 9 mln tonna astyq eksporttaıdy. Bul týraly búgin Úkimet úıinde ótken baspasóz máslıhatynan keıin QR Aýyl sharýashylyǵy vıtse-mınıstri Gúlmıra Isaeva málim etti, dep habarlaıdy QazAqparat.
«Qazirgi ýaqytta egistik alqabynyń shamamen 95-96 paıyzy bastyryldy. Jınalǵan astyqtyń kólemi 20 mln tonnany quraıdy. Biz aǵymdaǵy jyly keminde 9 mln tonna astyqty eksportqa shyǵaramyz dep boljap otyrmyz», - dedi ol.
Vıtse-mınıstrdiń aıtýynsha, qazaq astyǵyn shyǵaratyn jańa naryqtar ashylyp, fıtosanıtarlyq-karantındik talaptardy kelisý rásimderi júrgizilýde.
«Máselen, 2015 jyldyń jeltoqsanynda Qytaı tarapy qol qoıǵan hattama osy eki jyldyń ishinde QHR-ǵa astyq eksporty kólemin arttyrýǵa septigin tıgizdi. Bizdiń bıznes úshin tasymaldyń ońtaıly úlgisi kelisildi. Eger de buǵan deıin tek móshekke salynǵan bıdaıdyń jetkizilýine ruqsat bolsa, endigi ýaqytta temir jol kóligi astyq tasymaldaıtyn vagondarmen, konteınerlermen jetkizýge múmkindik bar. ıAǵnı, jańa naryqtar ashý baǵytynda jumystar júrgizip jatyrmyz», - dedi Gúlmıra Isaeva.
Sonymen qatar ol aǵymdaǵy jyldyń kúz aıynda Vetnamǵa Qazaqstan astyǵynyń alǵashqy synama partııasy jetkizilgendigin, EAEO aıasynda Sıngapýrmen jáne Úndistanmen erki saýda aımaǵyn qurý boıynsha kelissózderdiń júrgizilip jatqandyǵyn aıryqsha atap ótti.
