Bıyl Qazaqstan ekonomıkasynyń ósimi 3,6–3,9% deńgeıinde bolady –Ulttyq bank
ALMATY. QazAqparat - Ulttyq bank tóraǵasynyń orynbasary Aqyljan Baımaǵambetov «2021 jyldyń mamyr-maýsymyna» arnalǵan boljamdy raýnd boıynsha ınflıatsııanyń jedeldeýi, bazalyq stavkanyń bir deńgeıde qalýy jáne tólem balansynyń jaqsarýy týraly málimet usyndy, dep habarlaıdy QazAqparat tilshisi.
Onyń aıtýynsha, ekonomıkanyń naqty sektoryndaǵy qalpyna keltirý protsesteri qarqyndy. 2021 jyldyń qańtar-aqpan aılaryndaǵy aıtarlyqtaı tómendeýden keıin, naýryz-sáýir aılarynda ekonomıkanyń jaǵymdy qarqyny baıqaldy. 2021 jyldyń qańtar-sáýir aılarynda JІÓ-niń shynaıy ósimi jyldyq kórsetkishte 0,7% boldy.
Ekonomıkanyń keıbir salalarynda iskerlik baılanys jaqsarǵan soń, shynaıy jalaqynyń ósýine baılanysty, sondaı-aq zeınetaqy men shákirtaqynyń bıýdjeti artqannan keıin halyqtyń ál-aýqaty da jaqsaryp, ol óz kezeginde tutynýshylyq suranystyń qalpyna kelýine yqpal etti. 2021 jyldyń birinshi toqsan qorytyndysy boıynsha, halyqtyń shynaıy kirisi jyldyq kórsetkishte 3,4% artty.
«Al, turǵyn úı qurylysyndaǵy ınvestıtsııanyń qarqynyna toqtalsaq, bunda da joǵary ósim saqtalyp otyr. Onyń ústine, bul sala memlekettik ıpotekalyq nesıelendirý baǵdarlamalary men Memleket basshysynyń turǵyn úı jaǵdaıyn jaqsartý úshin azamattarǵa zeınetaqy jınaqtarynyń bir bóligin sheshýge ruqsat berý týraly bastamasymen qoldaý tapty»,- dedi spıker.
Ekonomıkanyń tez qalpyna kelýin eskere otyryp, Ulttyq bank ekonomıka ósimine qatysty boljamyn arttyrý turǵysynan qaıta qarap shyqty.
«Ekonomıka salalaryndaǵy iskerlik belsendilik barynsha tez qalpyna kelip, halyqtyń tabysy artady degen boljam bar. Bul óz kezeginde jıyntyq suranystyń keńeıýine yqpal etedi, ol ekonomıka ósiminiń draıveri bolady. Sonymen qatar, JІÓ-niń qarqynyn ustap turýǵa ımporttyń qalpyna kelýi yqpal etedi. Eksport osy jyldyń ekinshi jartysynda qalpyna keledi dep kútilip otyr. Oǵan OPEK+ shekteýleriniń jeńildetilýine qaraı munaı óndirisi kólemin arttyrý, Qazaqstannyń eksporttyq taýarlaryna syrtqy suranystyń artýy aqpal etpek.
Budan ózge, bıyl bıýdjettiń shyǵyndary kóbeıýi jaǵyna qaraı qaıta qaralǵan bolatyn. Óz kezeginde, barynsha jaǵymdy shynaıy ımpýls ishki suranystyń qalpyna kelýine yqpal etedi, sol arqyly ekonomıkanyń ósimine de, ınflıatsııalyq protsesterge de ósim sıpatynda yqpal etedi», - dedi Ulttyq bank basshysynyń orynbasary.
«2021 jyldyń aqpan-naýryzy» boljamdyq raýndymen salystyrǵanda Ulttyq bank bazalyq stsenarıı boıynsha munaı baǵasyn qaıta qarady.
Qazir Brent markaly munaıdyń álemdik baǵasy barreline shamamen 70 AQSh dollaryna shaq bolyp tur. Bul, álem elderindegi jappaı vaktsınatsııa men munaı kólemin azaıtý týraly OPEK+ kelisimi aıasyndaǵy áreketterden keıi munaıǵa álemdik suranystyń qalpyna kelýimen baılanysty. Alaıda, munaı óndirý kólemi álem boıynsha aqyryn-aqyryn arta bastaǵan soń álemdegi munaı baǵasy qazirgi kórsetkishten azaıady jáne Ulttyq bank bazalyq stsenarıı retinde 2021-2022 jyldary Brent markaly munaıdyń baǵasy barreline 60 AQSh dollaryn quraıdy dep boljap otyr, buny halyqaralyq uıymdardyń boljamy da rastaıdy.
Bazalyq stsenarııge sáıkes, 2021 jyly Qazaqstan ekonomıkasynyń ósimi 3,6–3,9% deńgeıinde bolyp, ary qaraı kelesi jyly 4,0%–4,3%-ke deıin jedeldeıdi degen boljam bar.
