Bıyl Qazaqstan ekonomıkasy asa joǵary belgisizdik jaǵdaıynda damydy – Ulttyq bank

ASTANA. QazAqparat – Úkimettiń keńeıtilgen otyrysynda QR Ulttyq bankiniń basqarma tóraǵasy Ǵalymjan Pirmatov ınflıatsııanyń artýyna sebep bolyp otyrǵan negizgi faktorlarǵa toqtaldy, dep habarlaıdy QazAqparat tilshisi.

«2022 jylǵy Qazaqstannyń ekonomıkasy men qarjy sektory buryn-sońdy bolmaǵan ózgerister men asa joǵary belgisizdik jaǵdaıynda damydy. Energııa, azyq-túlik pen shıkizat taýarlarynyń álemdik baǵasynyń aıtarlyqtaı ósýimen qatar taýar jetkizý joldarynyń buzylýy ınflıatsııalyq protsesterdi kúsheıte tústi», - dedi Ǵalymjan Pirmatov.

Onyń paıymynsha, ınflıatsııalyq qysymnyń ósýi álemdegi ortalyq bankterdiń aqsha-kredıt talaptarynyń tez ári sınhrondy túrde qatańdaýyn týyndatqan.

«AQSh federaldyq rezervtik júıesiniń mólsherlemeni agressıvti túrde kóterýi damýshy elderdiń valıýtalaryna qysym jasap, dollardyń sońǵy 20 jyldaǵy eń joǵary deńgeıge nyǵaıýyna alyp keldi», - dedi Ulttyq bank basshysy.

Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Jıyn barysynda elimizdiń bıylǵy áleýmettik-ekonomıkalyq damýynyń negizgi kórsetkishteri týraly esep beriledi jáne Úkimettiń 2023 jylǵa arnalǵan jumys jospary qarastyrylady dep josparlanyp otyr.