Bıyl Qazaqstan boıynsha 6,5 mln. sharshy metr jańa baspana paıdalanýǵa berilmek
ASTANA. 26 shilde. QazAqparat - Aǵymdaǵy jyly el boıynsha 6,5 mln. sharshy metr baspana paıdalanýǵa berilýi tıis.
Bul týraly búgin QR Qurylys jáne turǵyn úı-kommýnaldyq sharýashylyq isteri agenttiginiń alqa májilisinde vedomstvonyń jaýapty hatshysy Salaýat Dembaı málim etti.
Onyń atap ótýinshe, 2012 jylǵy 1 shildeden bastap qoldanysqa engizilgen «Qoljetimdi turǵyn úı-2020» baǵdarlamasynyń negizgi mindeti Qazaqstandaǵy turǵyn úı qurylysynyń kólemin qazirgi kezdegi 6 mln. sharshy metrden 2020 jylǵa qaraı jylyna 10 mln. sharshy metrge arttyrý bolyp tabylady. Al ol mindetterdi oryndaý úshin agenttik «Jol kartasyn» ázirledi, atalǵan qujatta baǵdarlamany iske asyrý jónindegi is-qımyldyń qadamdyq jospary jan-jaqty jazylǵan. «Aǵymdaǵy jyly «Jas otbasylar úshin turyǵyn úı» baǵyty boıynsha qurylysty aıaqtaý úshin bıýdjetten 15 mlrd. teńge kóleminde qarajat bólindi. Jalpy, aǵymdaǵy jyly 6 mln. 500 myń sharshy metr turǵyn úıdi iske qosý qajet. Búgingi kúni oblystardyń ákimdikteri osy qarajatty ıgerýge kirisip ketti», - dedi ol.
Budan bólek S.Dembaıdyń sózine qaraǵanda, agenttik Indýstrııa jáne jańa tehnologııalar mınıstrligimen birlesip, úı qurylysy kombınattaryn uıymdastyrý jónindegi jumystardy bastady. Óńirlerdegi ákimdikter úı qurylysy kombınattaryn uıymdastyrýǵa qatysýshylarmen-kompanııalarmen nıet jáne ózara yntymaqtastyq týraly memorandým jasaýǵa kiristi.
