Bıyl Qazaqstan aýmaǵynda 410 mln túp aǵash otyrǵyzylady
ASTANA. QazAqparat – Bıyl 188,8 myń gektar alqapqa 409,4 mln túp aǵash otyrǵyzý josparlanǵan. Bul jaıynda Premer-Mınıstrdiń birinshi orynbasary Roman Sklıardyń Senat depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Qazirgi ýaqytta memlekettik orman qorynyń jalpy aýmaǵy - 30,5 mln gektar, onyń ishinde orman japqan aýmaq - 13,6 mln gektar. Memleket basshysynyń orman qory jerlerinde 2 mlrd túp aǵash otyrǵyzý tapsyrmasyn oryndaý maqsatynda ár óńirde ormandy molyqtyrý jáne aǵash ósirý keshendi jospary ázirlenip, bekitildi. Aıtalyq, 2021 jyly - 130 mln túp, 2022 jyly - 282 mln túp aǵash otyrǵyzylyp, jyldyq jospar 100 paıyz oryndaldy. Bıyl 188,8 myń gektar alqapqa 409,4 mln túp aǵash otyrǵyzý josparlanǵan», - dep atap ótedi Úkimet basshysynyń birinshi orynbasary jaýabynda.
Onyń aıtýynsha, orman qoryn tolyqtyrý jónindegi is-sharalardy josparly júzege asyrý 2029 jylǵa qaraı orman japqan jer aýmaǵyn 14,5 mln gektarǵa deıin jetizge múmkindik beredi.
«Buǵan qosa, ekologııalyq ahýaldy jaqsartý úshin Aral teńiziniń qurǵap qalǵan tabanynda fıtoormanmelıoratıvtik jumys júrgizilip jatyr. 2025 jylǵa deıin 1,1 mln gektar aýmaqqa sekseýil kóshetin otyrǵyzý josparlanǵan», - dedi ol.
