Bıyl Qazaqstan aýmaǵy arqyly Reseıge 25 mlrd. tekshe metr túrikmen jáne ózbek gazy tasymaldanady
ASTANA. Sáýirdiń 16-sy. QazAqparat /Ernur Aqanbaı/ - Bıyl Qazaqstan aýmaǵy arqyly Reseıge 25 mlrd. tekshe metr túrikmen jáne ózbek gazy tasymaldanatyn bolady. Bul týraly búgin Astanadaǵy baspasóz máslıhatynda «Intergaz Ortalyq Azııa» AQ bas dırektory Serik Estaı málim etti,
dep habarlaıdy QazAqparat.
Onyń sózine qaraǵanda, aǵymdaǵy jyly Qazaqstan aýmaǵy arqyly Túrikmenstannan Reseıge 10,5 mlrd. tekshe metr, al Ózbekstannan 15 mlrd. tekshe metr gaz tasymaldanady. Osylaısha bizdiń elimiz arqyly 25 mlrd. tekshe metr túrikmen jáne ózbek gazy ótetin bolady. «Sondaı-aq Reseıden Batys Qazaqstan arqyly 46 mlrd. tekshe metr gaz tasymaldanatyn bolady, Qarashyǵanaq gazynyń eksporty - 7,5 mlrd. tekshe metrdi quraıdy», dedi ol.
Aıta keteıik, «Intergaz Ortalyq Azııa» AQ «QazMunaıGaz» AQ enshiles uıymy «QazTransGaz» AQ kompanııalar tobyna jatady. «Intergaz Ortalyq Azııa» AQ Qazaqstan aýmaǵy boıynsha gaz tasymaldaý júıesindegi monopolııalyq operator bolyp tabylady. Bul kompanııa uzaqmerzimdi kontsessııalyq kelisimsharttar negizinde gazdyń halyqaralyq tranzıtin, eksportyn jáne ishki tasymalyn júzege asyrady.
