Bıyl Qazaqstan 22 mln tonna munaıdy shetelge eksporttady
NUR-SULTAN. Qaz-Aqparat – Bıyl elimize 22,1 mln tonna munaı eksporttalyp, qańtar-sáýir aılarynyń jospary 100% oryndaldy. Bul týraly Úkimet otyrysynda QR Energetıka mınıstri Nurlan Noǵaev aıtty, dep habarlaıdy QazAqparat tilshisi.
«Bıyl tórt aıda munaı jáne kondensat óndirý kólemi 28,1 mln tonnaǵa jetip, jospar 99,4% oryndaldy. Munaı jáne kondensat óndirý kóleminiń esepti aıdyń josparynan tómen bolýynyń sebebi – sáýir aıyndaǵy Qarashyǵanaq ken ornyndaǵy jospardan tys jóndeý jumystary», - deıdi Nurlan Noǵaev.
Ol munaı-gaz salasyndaǵy iri kompanııalardyń kórsetkishine toqtalyp ótti.
«Teńiz jobasynda atalǵan kezeńde 9 mln tonna munaı óndirilip, jospar 100,1% oryndaldy. Soltústik Kaspıı jobasy – Qashaǵanda munaı óndirý kólemi – 4,9 mln tonna boldy, ıaǵnı qańtar-sáýir aılarynyń jospary 100% oryndaldy. Qarashyǵanaq jobasynyń kórsetkishi 4 mln tonnany qurap, jospar 96,3% oryndaldy. Osy kezeń ishinde 22,1 mln tonna munaı eksporttalyp, bıylǵy qańtar-sáýir aılarynyń jospary 100% atqaryldy», - deıdi mınıstr.
