Bıyl «Qazaqfılm» kınostýdııasy prokatqa 10 kınotýyndyny shyǵarady

«Qazaqfılm» málimetine qaraǵanda, aqpannyń sońynda balalarǵa arnalǵan «Jeńis semseri» fılmi prokatqa shyǵady. Kartınanyń jelisine keler bolsaq, mektep oqýshysy tylsym eski qylysh taýyp alady. Osy qylyshty izdegen batyr men jonǵar áskerleri ótken ǵasyrlardan bizdiń zamanymyzǵa ótip ketkende qyzyqtyń bári osy jerden bastalady.

Qazaqtyń halyq ertegisiniń jelisi boıynsha túsirilgen, Qazaqstannyń alǵashqy tolyqmetrajdy "Er Tóstik pen AıdaHar" anımatsııalyq fılmi prokatqa naýryz meıramy qarsańynda shyǵady. Qazaq folklor keıipkerlerin 3D formatyna salyp, anımatsııalyq týyndyny dúnıege alyp kelgen elimizdiń eń úzdik kompıýterlik grafıka mamandary men anımatorlar.

Sáýir aıynyń ortasynda jaryqqa shyǵatyn «Arman oryndalǵan kezde» fılminde Nazarbaev University JOO-da oqıtyn stýdentterdiń ómiri baıanadalady. Kartınada basty keıipkerlermen birge tanymal mýzykanttar, telejúrgizýshiler jáne elimizdiń basqa da tanymal tulǵalary oınaıdy.

"Ohota za prızrakom" fılmi - ekshn janryndaǵy ǵylymı fantastıka elementteri bar týyndy. Fılm mamyr-maýsym aılarynda jaryqqa shyǵady dep josparlanyp otyr. Basty rólderdiń biri - er júrek polıtseıdi somdaǵan Sanjar Mádıev, ol hakerdi qolǵa túsirmek bolady. Hakerdiń rólin somdaǵan reseılik ánshi Alla Pýgachevanyń nemeresi Nıkıta Presnıakov. Basty keıipkerlerge bóget jasap, olardyń jolyn kesken Rash esimdi arýdyń rólin somdaǵan gollıvýdtyń tanymal juldyzy, «Termınator -3» fılmi arqyly tanylǵan aktrısa Krıstanna Loken. Sonymen qatar, fılmde Gollıvýdtyń taǵy da bir juldyzy Armand Assante («Odısseı», «Gangster», «Korolı mambo») jáne otandyq aktrısa Ásel Saǵatova («Mahabbat tálkegi») oınaıdy.

Jazǵy maýsymda kınostýdııanyń eń tabysty jobalarynyń biri - Qazaqstan Respýblıkasynyń Tuńǵysh Prezıdenti, Elbasy N.Á. Nazarbaevtyń shyǵarmalarynyń jelisi boıynsha túsirilgen «Kóshbasshy joly («Pýt lıdera») atty kınoepopeıanyń jalǵasy - trılogııanyń eki birdeı fılmi kórermenge jol tartady. «Ognennaıa reka» jáne «Temir taý» («Jeleznaıa gora») dep atalatyn fılmderde Elbasynyń stýdenttik ómiri, dostary men mahabbaty jaıly, Temirtaý qalasynda bastaǵan eńbek joly baıandalady. Esterińizge sala ketsek, trılogııanyń alǵashqy bólimi «Balalyq shaǵymnyń aspany» fılmi 2011 jyly jaryqqa shyqqan bolatyn.

"Jol" («Pýt boksera») atty sport dramasy kórermen nazaryna kúz aılarynda usynylady. Asqar Uzabaev («Ǵashyq júrek») pen Farhat Sháripov («Qyzǵylt qoıan týraly hıkaıa») qolǵa alǵan jobada kóshedegi tóbelesterden kásipqoı boksshyǵa aınalǵan chempıonnyń sporttaǵy ómiri sýretteledi. Eń qyzyǵy, fılmge shynaıy boksshy - chempıondar da qatysqan eken. Kartınadaǵy keıbir tóbelester Astana qalasynda ótken kásibı jarystar kezinde túsirilgen eken. Basty rólderde: Nazar Sultanbekov, Erjan Túsipov, Erik Joljaqsynov, Farhat Ábdiraıymov.

Sonymen qatar, kóktemde «Qazaqfılm» kınostýdııasynyń «Avtorlyq kıno» atty arnaıy kórsetilim sheńberinde, halyqaralyq kınofestıvalderde kóptegen júldelerge qol jetkizgen fılmder: Dámir Manabaıdyń «Lotereıa», Ádilhan Erjanovtyń «Rıeltor» jáne Dárejan Ómirbaevtyń «Stýdent» fılmderi prokatqa shyǵady.