Bıyl kásipkerlikti damytý ulttyq jobasy aıasynda 1,6 trln teńge bólinip otyr

ASTANA. QazAqparat – Kásipkerlikti damytý jónindegi ulttyq joba aıasynda bıyl 1,6 trln teńge bólinip otyr. Bul týraly Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Ulttyq joba shaǵyn jáne orta kásipkerliktiń básekege qabiletti sektoryn qalyptastyrýǵa, kásipkerlerdiń ekonomıkalyq belsendiligin arttyrýǵa jáne sýbektiler úshin teń jaǵdaılar jasaýǵa baǵyttalǵan. Ulttyq jobany iske asyrý 4 baǵyt boıynsha júzege asyrylady, ıaǵnı kásipkerlik belsendilikti arttyrý, kásipkerlerdiń ósýin akseleratsııalaý, jańa baǵyttar qalyptastyrý, básekelestikti keshendi damytý qamtylǵan. 10 mindet, 30 kórsetkish jáne 69 is-shara aıqyndaldy», - dedi Á. Qýantyrov.

Osy oraıda ol ulttyq joba óz isin ashý jáne damytý úshin jaǵdaı jasaýǵa, sýbsıdııalanatyn jumys oryndaryn uıymdastyrý arqyly kásipkerlerdi qoldaý jáne kásipkerlerdiń qajettilikterine qaraı daǵdylardy damytýǵa, kásipkerlik sýbektileri úshin qarjylandyrý tetikterin jetildirýge baǵyttalǵan.

«Ulttyq jobanyń is-sharalaryn qarjylandyrýdyń jalpy kólemi 2021 jylǵa 897 mlrd teńgeden astam somany qurady, onyń ishinde respýblıkalyq bıýdjetten 271 mlrd teńge qarastyryldy. 2022 jyly ulttyq jobany iske asyrýǵa 1,6 trln teńge josparlanǵan, onyń ishinde bıýdjetten tys qarajat 1,2 trln teńgeden astam», - dedi mınıstr.