Bıyl Qaraǵandyda 60 myń sharshy metrden astam jol jóndeledi
QARAǴANDY. QazAqparat – Qaraǵandyda jol jóndeý jumystary bastaldy. Osyǵan deıin Abaı kóshesinde atqarylǵan jumystar, endi Buqar jyraý dańǵyly jáne taǵy 49 baǵyt boıynsha jalǵaspaq, dep habarlaıdy QazAqparat tilshisi.
Qaraǵandy qalasy ákimi baspasóz qyzmetiniń málimetinshe, qalada uzyndyǵy 104,1 km bolatyn 62 jol ýchaskesine jóndeý jumystary júrgizilip jatyr.
«Tekserý barysynda 10 kepildi ýchaskede júrgizilgen jumystar boıynsha eskertý jasaldy. Olar: Gogol kóshesi, Stepnoı-1-2-3 shaǵyn aýdanyndaǵy oramishilik jol, Popov, Qazaqstan, Dúısembekov, Rysqulov, Erjanov, Buqar jyraý, Komıssarov dańǵyldary jáne Saran tasjoly. Merdiger uıymdar kemshilikterdi joıýǵa kiristi, bul baǵyttaǵy jumystar mamyr aıynyń sońyna deıin aıaqtalyp qalýy da múmkin», – delingen habarlamada.
Qaraǵandy qalasy boıynsha avtomobıl joldarynyń uzyndyǵy 920 shaqyrymdy quraıdy. Onyń 560,4 shaqyrymy asfaltbeton jabynymen qaptalǵan. Bıyl 66 myń sharshy metr joldy aǵymdy jóndeý josparlanǵan.
24 ýchaskede nemese 26,2 shaqyrym jolda jabynnyń joǵarǵy qabatyn aýystyrý jáne ortasha jóndeý júrgiziledi. Búginde Sechenov kóshesinde jóndeý jumystary bastaldy, qalǵandary boıynsha daıyndyq sharalary júrip jatyr.
Aıta ketý kerek, jýyrda Qaraǵandy qalasy ákimdiginde ótken jıynda joldardyń jaǵdaıy talqylandy. Qala basshysy Ermaǵanbet Bólekpaev merdigerlerdi ǵana emes, tehnıkalyq qadaǵalaý qyzmetin de synǵa aldy. Ol jumys barysynda aqaýlardy kózden tasa etken tehnıkalyq qadaǵalaý uıymdaryna qatysty is qozǵaýdy talap etti.
