Bıyl Qaraǵandy oblysyndaǵy kolledjderde 10 jańa mamandyq ashylady
QARAǴANDY. QazAqparat – Qaraǵandy oblysyndaǵy kolledjderde 10 jańa mamandyq ashylady. Bul óńirdegi suranysqa ıe mamandardyń tapshylyǵyn joıýǵa múmkindik beredi, dep habarlaıdy QazAqparat tilshisi.
Integratsııalanǵan modýldi bilim berý baǵdarlamalaryn engizýdiń arqasynda stýdentter birden bir mamandyqtyń ornyna birneshe biliktilik alady. Kolledjderde eńbek naryǵyn taldaýǵa negizdelgen SKILLS-ID baǵdarlamasy engizilýde. Talap etilmegen mamandyqtar sany qysqaryp keledi. Onyń ornyna jańa, áleýettileri ashylyp jatyr.
Bul týraly pedagogtardyń tamyz keńesinde onlaın rejımde Qaraǵandy oblysynyń bilim basqarmasynyń basshysy Gúlsim Qojahmetova aıtyp berdi.
«Sońǵy úsh jylda suranysqa ıe 10 mamandyq ashyldy, onyń ishinde eki mamandyq boıynsha daıyndyq tek bizdiń oblysta júrgiziledi – «Mıkroelektronıka jáne mobıldi qurylǵylar» jáne «Aqparattyq qaýipsizdik». Jańa oqý jylynda taǵy da 10 mamandyq ashamyz. Bul «Avtojoldar men áýe aılaqtardy salý jáne paıdalaný», «Tsıfrlyq tehnıka (túrleri boıynsha)», «Ǵımarattardy jobalaý men paıdalanýdyń avtomattandyrylǵan júıeleri», «Kıim dızaıny», «Ónerkásiptik ónim dızaıny», «Interer dızaıny», «Aqparattyq qaýipsizdik júıeleri», «Jańartylatyn energetıka», «Shınalar óndirisi», «Logıstıka», – dedi Gúlsim Qojahmetova.
15 kolledjde joǵary bilikti mamandardy daıarlaýǵa jáne jańa suranysqa ıe mamandyqtardy ashýǵa baǵyttalǵan «Jas maman» respýblıkalyq jobasy iske asyrylýda. Joba aıasynda kolledjder zamanaýı jabdyqtarmen jabdyqtalǵan.
Sondaı-aq, óńirde jeti quzyrettilik ortalyǵy quryldy. Bolashaqta olardyń biriniń bazasynda jattyǵý lageri bolady. Oblysta barlyǵy 15 quzyrettilik ortalyǵy bar. Kelesi jyly osyndaı segiz alań ashý josparlanýda.
«Dýaldy oqytýdy damytý boıynsha jumystar jalǵasýda. 360 kásiporynmen yntymaqtastyq ornatylǵan. Bıyl dýaldy oqytýmen qamtylǵan mamandyqtardyń úlesi 50% -dy quraıdy. Jumysshy mamandyqtardy dáripteýge baǵyttalǵan Worldskills halyqaralyq qozǵalysyn damytý boıynsha jumys jalǵasýda. Bıylǵy jyly túlekterdiń qorytyndy attestattaýy alǵash ret WorldSkills standarttaryn eskere otyryp, kadrlardy daıarlaý sapasyn baǵalaýdyń jańa quraly – demonstratsııalyq emtıhandy qoldaný arqyly ótkizildi», – dep atap ótti spıker.
Bul formattaǵy emtıhandardan 13 kolledj bazasynda 630 stýdent ótti. SkillsPassport alǵan túlekter jas mamandardyń málimetter bazasyna engizildi, oǵan qyzmetkerlerdi izdeý jáne irikteý úshin jetekshi kásiporyndardyń jumys berýshileri qol jetkize alady.
Óńir kolledjderi halyqaralyq kompanııalarmen de yntymaqtastyq ornatty. Reseılik «Tatneft» kompanııasymen birlesip Saran kópsalaly kolledjiniń bazasynda «Shınalar óndirisi» jańa mamandyǵy «Shına qurastyrýshy-qalyptaýshy», «Avtokamera agregat mashınısi», «Presteýshi-výlkanızatorshy», «Tehnık-tehnolog» biliktiligi boıynsha qurylady.
