Bıyl Qaraǵandy oblysynda kún elektr stantsııasy iske qosylady
NUR-SULTAN. QazAqparat – Búgin Úkimet otyrysynda Qaraǵandy oblysynyń ákimi Jeńis Qasymbek óńirde jańartylatyn energııa kózderin damytý jumystary týraly baıandady, dep habarlaıdy QazAqparat tilshisi.
«Qaraǵandy oblysynda jıyntyq qýaty 200 MVt bolatyn 4 kún elektr stantsııasy iske qosyldy. Budan basqa, oblysta eki bıogaz stantsııasy jumys isteıdi: Buqar jyraý aýdanyndaǵy qýaty 0,3 MVt «Volynskıı» kesheni, Abaı aýdanynyń Qurma aýylyndaǵy qýaty 1,07 MVt bıogaz qurylǵysy. Sondaı-aq, oblysta Yntymaq sý qoımasynda shaǵyn sý elektr stantsııasy jumys isteıdi. Oblys boıynsha jańartylatyn jáne balamaly energetıkanyń jalpy qýaty búgingi kúni 223 MVt quraıdy», - dedi J. Qasymbek.
Onyń aıtýynsha, 2019-shy jáne 2020-shy jyldardyń óndiristerin salystyra otyryp, elektr energııasyn óndirý 77 paıyzǵa aıtarlyqtaı ósken. Sońǵy úsh jylda iske asyrylǵan jobalar boıynsha ınvestıtsııalardyń jalpy kólemi shamamen 102 mlrd teńgeni qurady.
«Qazirgi ýaqytta oblys ákimdigi «KAZ GREEN ENERGY» kásipornymen birlesip, Balqash qalasynyń Qońyrat shaǵyn aýdanyna jaqyn jerde qýaty 100 MVt kún elektr stantsııasyn salýdyń taǵy bir jobasyn iske asyryp jatyr. Birinshi kezeńdi (50 MVt) iske qosý 2021 jyldyń tamyz aıyna belgilengen, 2 kezeńi (50 MVt) osy jyldyń jeltoqsan aıynda iske qosylady. Jobanyń jalpy quny - 39 mlrd teńge», - dep naqtylady ákim.
Budan basqa, Saran qalasynda Chehııa ınvestorlary belgilengen qýaty 100 MVt jáne odan joǵary jınaqtaýyshtary bar gıbrıdti kún elektr stantsııasy túrindegi túbegeıli jańa jańartylatyn energetıka obektisin salýdy josparlap otyr. Osy nysannyń qurylysyna jer ýchaskesin rezervteý jumystary aıaqtaldy. Qurylys jumystary bıyldyń sońynda bastalady dep josparlaǵan.
