Bıyl Qaraǵandy oblysynda gaz jelileriniń qurylysyna shamamen 7 mlrd teńge qarastyrylǵan
«Qaraǵandy oblysy úshin 2022 jylǵa arnalǵan avtomattandyrylǵan stantsııadan Qaraǵandy jáne Temirtaý qalalaryna deıin gaz jelilerin salý boıynsha jalǵastyrylyp jatqan 3 jobany iske asyrý úshin respýblıkalyq bıýdjetten 6,6 mlrd teńge mólsherinde qarajat kózdelgen. Sonymen qatar, 2023-2025 jyldarǵa arnalǵan respýblıkalyq bıýdjetti qalyptastyrý sheńberinde 2 jobany jalǵastyrý úshin 13,9 mlrd teńge mólsherindegi soma qoldaý tapty», - dep atap ótti Bolat Aqsholaqov.
Energetıka mınıstrliginiń basshysy atap ótkendeı, Qaraǵandy oblysyn gazdandyrý jobasy 76 mlrd teńge somasyna 24 iske qosý keshenin qoldanysqa engizýdi kózdeıdi. Onyń ishinde quny 65,2 mlrd teńge bolatyn 16 iske qosý kesheni Qaraǵandy qalasynyń 30 myńǵa jýyq úıin gazdandyrýǵa múmkindik beredi.
Búgingi kúni bir iske qosý kesheni paıdalanýǵa berildi, nátıjesinde 235 abonent tehnıkalyq sharttar alyp, 135-i tabıǵı gazǵa qol jetkizdi. Qalǵan 8 iske qosý kesheni Temirtaýdaǵy 9 128 úıdi gazdandyrýǵa múmkindik beredi. Metallýrgter qalasynda bir iske qosý kesheni jumysyn bastady, sonyń arqasynda 180 abonent tehnıkalyq sharttar alyp, al 119-y kógildir otynǵa qol jetkize alady. Birinshi iske qosý kesheni boıynsha jeliler «QazTransGaz Aımaq» AQ senimgerlik basqarýyna berildi.
Sondaı-aq, energetıka mınıstrligi óndirýshi zaýyttardyń shyǵyndaryn ishinara óteý maqsatynda shekti kóterme baǵany tonnasyna 33 600 teńge (19,7 teńge/lıtr) deńgeıinde bekitý boıynsha sharalar qabyldady. Al, Qaraǵandy oblysy úshin suıytylǵan gazdyń bólshek saýda baǵasy jyl sońyna deıin 1 lıtrine 70 teńge kóleminde saqtalady.
Óńirde 8 gaz toltyrý stantsııasy jáne 180-ge jýyq avtomobılge gaz quıý stantsııasy bar. Ótken jyly qaraǵandylyqtar 82 myń tonna suıytylǵan munaı gazyn tutynǵan. Al, aǵymdaǵy jyldyń segiz aıynda shamamen 53,2 myń tonna tutynyldy.
