Bıyl Qaraǵandy oblysynda ekonomıkanyń 3% ósimi belgilenip otyr
QARAǴANDY. QazAqparat – Qaraǵandy oblysynda 2021 jylǵa ekonomıka ósimin keminde 3,4% qamtamasyz etý mindeti qoıylǵan. Jalpy óńirlik ónim kólemi 6,1 trln teńgege jetýi tıis. Boljam boıynsha, ınvestıtsııalar 700 mlrd teńgeden asady, dep habarlaıdy QazAqparat tilshisi.
Memleket basshysynyń Úkimettiń keńeıtilgen otyrysynda jáne reformalar jónindegi joǵary keńeste bergen tapsyrmalary óńirde qalaı oryndalatyny týraly onlaın rejıminde ótken oblys ákimdigi apparatynyń keńesinde aıtyldy.
«Ótken jylǵy jumystar qalyptasqan jaǵdaılardy eskere otyryp, áleýmettik-ekonomıkalyq jaǵdaıdyń turaqtylyǵyn saqtaýǵa baǵyttalǵan bolatyn. Aǵymdaǵy jyl shekteý sharalarynyń áserin saqtaýdy nazarǵa alyp, ekonomıkalyq ósimdi qalpyna keltirýge baǵyttalyp otyr. Ónerkásipte bıyl 2020 jylǵy 3,3% ósimdi eskere otyryp, keminde 3 trln teńge kóleminde óndiristi qamtamasyz etý qajet. Mańyzdy faktorlar - júıe quraýshy kásiporyndardyń turaqty jumysy, shamamen 715 mlrd teńge kóleminde ınvestıtsııalar tartý jáne 3% ósý bolyp tabylady», - dedi Ekonomıka basqarmasynyń basshysy Azamat Muqanov.
Aýyl sharýashylyǵy ónimderin óndirý 6,5% ósimmen 429 mlrd teńgege josparlanyp otyr. Agroónerkásiptik keshende 1 459 jumys ornyn qurýmen 36 ınvestıtsııalyq jobany iske asyrý belgilengen.
Kólikte jyl qorytyndysy boıynsha 1,8% ósý boljanyp otyr.
Basqarma basshysynyń aıtýynsha, Prezıdent tapsyrmalaryn oryndaý úshin oblysta jedel áreket etý jáne turaqty áleýmettik-ekonomıkalyq jaǵdaıdy saqtaý boıynsha daǵdarysqa qarsy jospar ózektendiriledi.
Kásipkerlikti qoldaý jalǵasady. «Bastaý Bıznes» kýrstarynda 2021 jyly 1 500 adamdy oqytý josparlanýda. 2500-den astam jumys ornyn qurýmen 2 myńnan astam jobany iske asyrýǵa qarajat qarastyrylǵan.
«Eńbek» jáne «Jumyspen qamtý jol kartasy» baǵdarlamalary boıynsha qarastyrylǵan sharalarmen 36,5 myń adamdy qamtý josparlanýda.
Apparattyq keńeste ár salanyń damýyna toqtaldy. Ekologııalyq jaǵdaıdy jaqsartý, tsıfrlyq qyzmetterdi odan ári engizý máseleleri talqylandy. Ár baǵyt boıynsha oblys ákimi tapsyrma berdi.
«Mindetter kóp, jumys kólemi aıtarlyqtaı. Biz Memleket basshysynyń barlyq tapsyrmalaryn sapaly iske asyrý úshin júıeli model qurýymyz kerek», - dep atap ótti Jeńis Qasymbek.
