Bıyl Qaraǵandy oblysynda 600 myń sharshy metrden astam baspana paıdalanýǵa beriledi
QARAǴANDY. QazAqparat – Bıyl Qaraǵandy oblysynda 600 myń sharshy metrden astam baspana paıdalanýǵa beriledi. Halyqqa esep berý kezdesýinde oblys ákimi Jeńis Qasymbek osylaı málim etti, dep habarlaıdy QazAqparat tilshisi.
Qaraǵandy oblysynyń ákimi eń aldymen halyqtyń ómir súrý sapasyn jaqsartýǵa baǵyttalatyn jumys strategııasyn anyqtady. Basty basymdyq – qoljetimdi, sapaly úıler men joldar salý, turǵyndardy turaqty jumyspen jáne eńbekaqymen qamtamasyz etý, óńirdegi ekologııalyq máselelerdi sheshý.
«Oblysta joldar men úılerdiń qurylysy boıynsha arnaıy jol kartasy ázirlendi. Sondyqtan da osy salalardaǵy jumys qarqynyn eselep arttyrý josparda bar», dep atap ótti oblys ákimi Jeńis Qasymbek halyqqa esep berý kezdesýinde.
Óńirde gei kópbalaly otbasylardy jergilikti bılik aldaǵy eki jylda baspanamen tolyq qamtýdy maqsat etip otyr.
«Memleket basshysy aıtqandaı, turǵyn úımen qamtamasyz etý – bul áleýmettik saıasattyń basymdyǵy. Bizdiń tarapymyzdan osy jyly turǵyn úı qurylysyn oblys boıynsha keminde bir jarym ese jáne oblys ortalyǵynda eki ese ulǵaıtý úshin barlyq múmkindik jasalýda. Bizde eki jyl ishinde 1 800 kópbalaly otbasyn qamtamasyz etýge múmkindik bar dep esepteımin», - dedi oblys ákimi.
«Elbasy 2030 jylǵa qaraı bir adamdy turǵyn úımen qamtamasyz etýdi 30 sharshy metrge deıin jetkizýdi tapsyrdy», dep eske saldy óńir basshysy. Oblysta bul kórsetkish qazir 23 sharshy metrden asady.
Ótken jyly óńirde 421 myń sharshy metr turǵyn úı salyndy. 1 148 otbasy páter aldy. «Baqytty otbasy» baǵdarlamasy boıynsha 226 otbasy qonys toıyn toılady.
«2020 jyly 5 600 otbasy qonys toıyn toılaýy úshin 600 myń sharshy metrden astam turǵyn úı tapsyrylýy tıis. Bul páterlerdiń jartysy áleýmettik qorǵalatyn sanattarǵa arnalǵan. Budan basqa, jetim balalar úshin kezektiń jyljýyn jedeldetemiz. «Bul másele biz úshin de basymdyqqa ıe», - dedi Jeńis Qasymbek.
Onyń aıtýynsha, jańa qurylys sapasyn baqylaý kúsheıtilmek.
