Bıyl Qaraǵandy oblysynda 5 myń páter qoldanysqa beriledi
Qaraǵandy qalalyq máslıhatynyń depýtaty, oblystyq qurylysshylar qaýymdastyǵynyń tóraǵasy Tólegen Áshimovtiń aıtýynsha, ústimizdegi jyly 1 myńnan astam qaraǵandylyq kópten kútken baspanalaryna ıe bolady. Bul, túrli memlekettik baǵdarlamalar aıasynda kezekte turǵan oblys turǵyndary. Mysaly, nesıelik turǵyn úı baǵdarlamasy aıasynda Qaraǵandyda 10 úı jáne Jezqazǵanda 18 páterli bir úı tapsyrylady. Jalǵa beriletin baspana boıynsha óńirdiń 10 aımaǵynda 12 úıdiń qurylysy kútilýde.
Sonymen qatar, «Nurly jer» baǵdarlamasy sheńberinde Qaraǵandy oblysy boıynsha 2019 jyly qarjylandyrýdyń barlyq kózderi esebinen 4 myńnan astam páter qoldanysqa beriledi.
Jalǵa beriletin, nesıelik turǵyn úı jáne ınjenerlik-kommýnıkatsııalyq ınfraqurylym qurylysyna 10 mlrd 480 mln teńge qarastyrylǵan.
Sondaı-aq, Tólegen Áshimov «7-20-25» baǵdarlamasy boıynsha Qaraǵandy oblysynda bıýdjetten turǵyn úı sertıfıkatyna 1 mlrd teńge bólinetinin atap ótti. Ol sertıfıkattardy suranysqa ıe mamandar - dárigerler, muǵalimder, polıtseıler alatyny josparlanýda. Osylaısha, shamamen taǵy 700 otbasy óz baspanasyn satyp alý múmkindigine ıe bolady.
Budan bólek, jeke turǵyn úı qurylysyn damytý baǵytynda da jumystar atqarylýda. Máselen, bıyl ınjenerlik-kommýnıkatsııalyq ınfraqurylym qurylysyna (13 joba) respýblıkalyq jáne oblystyq bıýdjetten 2 798,8 mln teńge bólindi.
