Bıyl Qaraǵandy oblysynda 3 myńǵa jýyq úı ortalyq gaz qubyryna qosylady

QARAǴANDY. QazAqparat - Búgin Qaraǵandy oblysynyń ákimshiligindegi onlaın-otyrysta óńirdi gazdandyrý máseleleri talqylandy. Energetıka jáne TÚKSh basqarmasynyń basshysy Ulantaı Úsenov úılerdi kógildir otynǵa qosý jospary týraly baıandady, dep habarlaıdy QazAqparat oblys ákimdiginiń resmı saıtyna silteme jasap.

- Osy jyly Qaraǵandyda 1 865 úıdi gazdandyrýdy josparlap otyrmyz. Olarǵa gaz ótkizilgen. Temirtaýda 506 úıge gaz ótkizemiz. Jezqazǵanda – 550, gaz qubyryn ótkizý boıynsha jumystar tolyǵymen aıaqtaldy, - deıdi Ulantaı Úsenov.

Qazir oblysta gaz shyǵynyn esepteý quraldary satyp alynýda. Qolda 70 eseptegish bar. Olardy montajdaý osy aptada Temirtaý jáne Jezqazǵan qalalarynda bastalady.

Úıdi gazǵa qosý tek turǵynnyń kelisimimen bolady. Kelisim gaz taratý jelilerin paıdalanýǵa engizgennen keıin bastalady. Bul osy jyldyń qyrkúıek aıynyń basynda bolýy tıis.

Ázirge gaz qalanyń tek jeke sektorlarynda ǵana ótkizilýde.