Bıyl Qaraǵandy oblysynda 19 iri qurylys júzege asyrylady
QARAǴANDY. QazAqparat – Qaraǵandyda «Jumyspen qamtýdyń jol kartasy» boıynsha oblysta bıyl qandaı nysandar salynaty jaıly aıtyldy. Baǵdarlama aıasynda 19 jobany júzege asyrý josparlanǵan, dep habarlaıdy QazAqparat tilshisi.
Qaraǵandyda oblystyq kópsalaly balalar aýrýhanasynyń qurylysy aıaqtalady.
«Joba óte mańyzdy. Jańa aýrýhananyń jumysyna qajetti barlyq múmkindik jasaldy. Qurylysqa qarjy Jumyspen qamtýdyń jol kartasy asynda bólindi. Uzaq merzimdi qurylysty aıaqtaý kerek», – dedi oblys ákimi Jeńis Qasymbek onlaın rejıminde ótken apparattyq jıynda.
Qurylys, sáýlet jáne qala qurylysy bóliminiń basshysy Abzal Jaılybaevtyń aıtýynsha, baıqaýdyń qorytyndysy maýsym aıynyń ortasynda shyǵady. Osydan keıin merdiger jumysqa kirise alady.
Baǵdarlamanyń barysy týraly jumyspen qamtýdy úılestirý jáne áleýmettik baǵdarlamalar bóliminiń bastyǵy Ásem Júnispekova baıandady.
Óńirde Jumyspen qamtýdyń jol kartasyna sáıkes bıyl 19 iri ınfraqurylymdyq jobany iske asyrý josparlanǵan, onyń 13-i ótpeli, altaýy jańa. Jańa densaýlyq saqtaý nysandary, Qaraǵandyda mektep, tórt sporttyq-saýyqtyrý kesheni - Jezqazǵanda, Shahtınskide, Jezdi kentinde jáne Ulytaý aýdanynyń Qarsaqpaı kentinde, Nura kentinde basseın, Saran qalasynyń RTJ aýmaǵynda modýldik qazandyq salynady.
«Qurylys aıaqtalǵannan keıin 801 adam turaqty jumyspen qamtylatyn bolady», - dep atap ótti Ásem Júnispekova.
Departament basshysy Jumyspen qamtýdyń jol kartasy boıynsha ózgerister týraly aıtty. Endi baǵdarlama sheńberinde agroónerkásiptik keshen jobalaryn qarjylandyrýǵa bolady. Shaǵyn nesıeler Agrarlyq nesıe korporatsııasy arqyly «Bastaý Bıznes» jobasynyń túlekterine, sondaı-aq aýylsharýashylyq taýar óndirýshilerine beriledi.
«Jumyspen qamtýdyń jol kartasy – bul eń aldymen bizdiń turǵyndar úshin jumys oryndaryn qurý. Baǵdarlamanyń oryndalýy únemi baqylaýda bolady. Joba tımidi jáne onyń maksımaldy qaıtarymy bolýy kerek. Qalalar men oblystardyń ákimderi jumyspen qamtý ortalyqtary arqyly jumyspen qamtylýy kerek. Qarjy bólimi bólingen qarajattyń jumsalýyn únemi qadaǵalap otyrýy kerek», – dep atap ótti Jeńis Qasymbek.
Sondaı-aq, aımaq basshysy júzege asyrylyp jatqan jobalardaǵy jergilikti qamtýdyń úlesin baqylaýdy tapsyrdy. Qazaqstan Respýblıkasy Premer-Mınıstriniń ókimine sáıkes taýarlardyń, jumystar men qyzmetterdiń kem degende 90% -y otandyq óndirýshilerden satyp alynýy kerek.
