Bıyl Qaraǵandy qalasynda 70 shaqyrymnan astam jol jóndelmek
Bıyl Qaraǵandy qalasy kóshelerin jóndeýge 6 mıllıard teńge bólinip otyr. Osy arqyly 52 ýchaske anyqtalyp, 20 paıyzdan astamynda jumystar aıaqtalyp qoıǵan. Buqar jyraý kóshesi boıynsha 1,7 shaqyrym jol jóndelgen. Atap aıtar bolsaq, Goncharnaıa kóshesinen Dúısembekov, Ermekov kóshesinen Ábdirov dańǵylyna deıin asfalt tóselgen. Nazarbaev Chkalov arasyn qamtıtyn jol da jóndelgen. Respýblıka kóshesinde birneshe kún ýaqytsha shekteý qoıylyp, tıisti jumystar atqarylǵan soń kólik qozǵalysy qaıta qalypqa keltirildi.
Qala boıynsha jóndelýi tıis 72 shaqyrym joldyń ishinde Bóketov, Ǵaryshkerler kóshelerin jańǵyrtý jobasy da bar. Dúısembekov kóshesinen Qurylysshylar dańǵylyna deıingi aralyq aldaǵy aıda jóndeletin bolady. Baıqal, Raqymbekov, Popov kóshelerinde jóndeý aıaqtalǵan. 15 magııstraldaǵy Temirtaý baǵytyna deıingi joldyń 60 paıyzdan astamy qaıta qalypqa keltirilip, tıisti sharalar jalǵasýda.
«Bizde jeke sektorlar aýmaǵy úlken. Mıhaılovka, Maıqudyq boıynsha jumystar qolǵa alynǵan. Bıylǵy jyly basty nazar jeke sektordyń qara joldaryn asfalttaýǵa aýdarylyp otyr. Mıhaılovka, Berlın kenti, Fedorovka jáne qalanyń basqa bólikterindegi 50 kóshede asfalt tóseledi. Jol jóndeý boıynsha eń úlken joba – Ǵaryshkerler kóshesin qaıta qurý. Ol eki jylǵa eseptelgen», - deıdi Qaraǵandy qalasynyń TKSh, jolaýshylar kóligi jáne avtomobıl joldary bólimi basshysynyń orynbasary Grıgorıı Botnar.
Jańa sýaǵarlar Vavılov kóshesinde, sondaı-aq Neftebaza aımaǵynda salynady. Qurmanǵazy, Orsk jáne Reznık kóshelerinde 15 km nóser kárizin salý jeke aýlalardy erigen qar sýy basý máselesin sheshýge múmkindik beredi. Bıyl Úlken Mıhaılovka stantsııasyndaǵy temirjoldyń ústinen jaıaý júrginshiler kópiri salynady. Turǵyndar tarapy jol sapasyna qatysty qandaıda bir kúmándi jaıttar baıqasa «Jol aktıvteriniń ulttyq sapa ortalyǵy» mekemesine júginse bolady. Mamandar tóselgen asfalttiń qanshalyqty sapaly ekenin arnaıy qurylǵylar arqyly anyqtamaq.
