Bıyl «Qaraǵandy – Balqash» joly ashylady

QARAǴANDY. QazAqparat - Bıylǵy jyly «Qaraǵandy-Balqash» jolynda 4 jolaq boıynsha qozǵalysty iske qosý josparlanýda. Qaraǵandy oblysyndaǵy jol jumystarynyń jospary týraly halyq aldynda esep berý kezdesýinde Jeńis Qasymbek osylaı málim etti, dep habarlaıdy QazAqparat tilshisi.

Ákimniń aıtýynsha, «Balqash-Býrylbaıtal» jolyn qaıta jańartý jalǵastyrylady. Ol da tórt jolaqty bolady.

Ótken jyly óńirde respýblıkalyq, oblystyq jáne jergilikti mańyzy bar joldarda 1 300 shaqyrym jol tósemi retke keltirildi. Bıyl jol jóndeý jumysynyń kólemi artty.

«Bıyl 15 00 shaqyrym avtojol jóndeledi. Ótken jyly «Temirtaý-Qaraǵandy», «Qaraǵandy qalasynyń Soltústik jáne Shyǵys aınalma joldary» avtoban jol tolyǵymen qoldanysqa berildi. Bıyl shilde aıyna deıin bul eki jol tolyǵymen abattandyrylady. Jaryq tartylyp, qorshalady, belgileý jasalyp, belgiler ornatylady. Biz úshin uzyndyǵy 720 shaqyrym «Jezqazǵan-Qyzylorda» avtojolynyń qurylysy mańyzdy. Mamyr aıynda jobalyq-smetalyq qujattama aıaqtalady. «Nurly jol» baǵdarlamasynyń jańa besjyldyǵy aıasynda bıyl jol qurylysyna kirisý josparlanyp otyr. Ol 2025 jyly aıaqtalýy tıis», – dep atap ótti Jeńis Qasymbek.

Budan basqa, «Qaraǵandy-Jezqazǵan» jolyn jobalaý bastalady. Sondaı-aq «Qaraǵandy-Pavlodar» jáne «Qaraǵandy-Qarqaraly» respýblıkalyq joldaryn qaıta jańartý josparlanýda.

Jol ınfraqurylymyn jaqsartýdan basqa, «Nurly jol» baǵdarlamasyn júzege asyrý halyqty jumyspen qamtýǵa septigin tıgizedi, dep atap ótti Jeńis Qasymbek.

Barlyq jobalarǵa úsh myńnan astam jergilikti turǵyn tartylady.