Bıyl Qaraǵandy avtoparkteri 80 jańa avtobýs satyp alýy tıis
«Ózekti másele – iri qalalardaǵy qoǵamdyq kóliktiń jumysy. Avtobýstardyń shyǵý kestesi saqtalmaıdy. Mysaly, oblys ortalyǵynda jospar boıynsha 202 avtobýs shyǵýy tıis, al shyn máninde 150–170 shyǵady. Bıyl shamamen 80 avtobýs satyp alý kerek. Ol úshin bizdiń óz avtobýs zaýytymyz bar. Kelesideı qaǵıdany ustanýymyz kerek: avtoparkter avtobýstardy aýystyrsa, marshrýttar alady, eskilerimen jumys istese – almaıdy», – dedi aımaq basshysy ákimdiktiń keńeıtilgen otyrysynda.
Qaraǵandy ákimi Ermaǵanbet Bólekpaevtyń aqparatyna súıensek, qala boıynsha jolaýshylar kóliginiń 60% jańartyldy.
Ol avtoparktermen jańa avtobýstar satyp alýǵa keliskenin habarlady.
Jolaýshylar kóligi jáne avtomobıl joldary basqarmasynyń málimetinshe, 2021 jyly Qaraǵandyda otandyq óndiristiń 40 jańa avtobýsy, Temirtaýda – 20, Jezqazǵanda – 20, Saran qalasynda – 11 jańa avtobýs iske qosyldy.
Oblys ákimi sondaı-aq elektrondy bıletteýge kóshýdi jedeldetýdi tapsyrdy.
«Bul naryqty zańdastyrýǵa alyp keledi. Jolaýshylardyń naqty sanyn bilýge múmkindik beredi. Osyǵan súıene otyryp, jolaýshylar tasymalyn qalypty túrde sýbsıdııalaı alamyz», – dep atap ótti Jeńis Qasymbek.
Sonymen qatar, óńir basshysy jol qozǵalysy qaýipsizdigin qamtamasyz etý jónindegi oblystyq komıssııanyń jumysyn kúsheıtýdi talap etti.
Jol ınfraqurylymyn damytý týraly Jolaýshylar kóligi jáne avtomobıl joldary basqarmasynyń basshysy Saıat Shaımın baıandady.
Onyń aıtýynsha, bıyl oblys boıynsha 1 336 shaqyrym avtojoldy jóndeý josparlanǵan.
Qaraǵandy – Balqash jáne Balqash – Býrylbaıtal respýblıkalyq trassalarynyń ýchaskelerin qaıta jańartý jalǵastyrylady. Jezqazǵan-Qyzylorda jolynyń kópten kútken jańarýy bastalady.
Aldaǵy ýaqytta Novodolınka – Shahan – Molodetskoe, Nura – Shahter, Jartas – Dolınka, Qaraǵandy – Úshtóbe – Qurylys, Osakarovka – Molodejnoe oblystyq avtojoldaryndaǵy jóndeý jumystary aıaqtalady. Joshy han men Dombaýyl kesenelerine jol salynady.
Taǵy bir mańyzdy joba – Nura men Osakarovka arasyndaǵy joldy qaıta salý.
Bıyl eń problemaly ýchaskedegi jumystar bastalady. Olar 2023 jyly joldy tolyǵymen jańartýǵa ýáde beredi.
«Aýyl – el besigi» arnaıy jobasy boıynsha kentishilik joldardy retke keltirý jalǵastyrylady.
