Bıyl qańtarda 52 myń adam Eńbek baǵdarlamasyna qatysty

NUR-SULTAN. QazAqparat - 2021 jylǵy qańtarda 52,4 myń adam Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan «Eńbek» memlekettik baǵdarlamasyna qatysty, dep habarlaıdy QazAqparat tilshisi.

Osy oraıda 49,3 myń adam jumysqa ornalastyryldy, onyń 13,8 myńy – turaqty jumysqa.

«Sýbsıdııalanatyn jumys oryndaryna 35,7 myń adam jumysqa ornalastyryldy. Onyń ishinde: áleýmettik jumys oryndaryna – 3,7 myń, jastar praktıkasyna – 1,4 myń; qoǵamdyq jumystarǵa – 30,6 myń adam», - delingen Eńbek mınıstrliginiń málimetinde.

Esterińizge sala keteıik, 2020 jyly «Eńbek» memlekettik baǵdarlamasyna 649 myń adam qatysty. 437,3 myń adam jumysqa ornalastyryldy, onyń 319,2 myńy turaqty jumysqa turdy. Jappaı kásipkerlikti damytýǵa 12,7 myń mıkrokredıt jáne jańa bıznes-ıdeıalardy iske asyrýǵa 44,9 myń memlekettik qaıtarymsyz grant berildi. Qysqa merzimdi oqytý kýrstaryna 18,7 myń adam jiberildi, al TjKB uıymdarynda oqytýmen 18,4 myń adam qamtyldy.

Budan basqa, eńbek resýrstarynyń utqyrlyǵyn arttyrý aıasynda jumys kúshi artyq óńirlerden quramynda 5,8 myń adam bar 1,8 myń otbasy qonys aýdardy.