Bıyl qańtar-qyrkúıek aılarynda elimizdegi ІJÓ-niń kólemi 14 trln. 250,6 mlrd. teńgeni qurap, ótken jyldyń sáıkes kezeńimen salystyrǵanda 7,5 paıyzǵa ósti - J. Aıtjanova
ASTANA. 14 jeltoqsan. QazAqparat /Rýslan Ǵabbasov/ - Bıylǵy 11 aıdyń qorytyndysy boıynsha qysqa merzimde ekonomıkalyq ındıkator 107,2 paıyzdy qurady. Bul týraly búgin 2010 jyldyń 11 aıyndaǵy áleýmettik-ekonomıkalyq damýdyń qorytyndysyna arnalǵan Úkimet otyrysynda Ekonomıkalyq damý jáne saýda mınıstri Janar Aıtjanova málim etti.
«2010 jyldyń 11 aıynyń qorytyndysy boıynsha qysqa merzimdi ekonomıkalyq ındıkator ótken jyldyń osy kezeńimen salystyrǵanda 107,2 paıyzdy qurady. Sonymen qatar bıylǵy qańtar-qyrkúıek aılary aralyǵyndaǵy Іshki jalpy ónimniń kólemi 14 trln. 250,6 mlrd. teńgeni qurap, ótken jyldyń sáıkes kezeńimen salystyrǵanda 7,5 paıyzǵa ósip otyr», - dep atap ótti mınıstr.
J. Aıtjanovanyń sózine qaraǵanda, ІJÓ quramynda taýarlar óndirisi 43,1 paıyzdy, qyzmetter kólemi 54 paıyzdy qurady. «ІJÓ óndirisiniń negizgi úlesin, ıaǵnı 31,4 paıyzyn ónerkásip óndirisi qurap otyr», - dedi J. Aıtjanova.
Atap aıtqanda, bıylǵy qańtar-qarasha aılaryndaǵy ónerkásip óndirisiniń naqty kólemi ındeksi ótken jyldyń osy kezeńine qaraǵanda 10,5 paıyzǵa ósti. Bul ósim óńdeý sektoryndaǵy óndiristiń 18,8 paıyzǵa, sondaı-aq taý-ken salasyndaǵy óndiristiń 5,7 paıyzǵa artýymen qamtamasyz etilip otyr.
