Bıyl qańtar-qarashada ekonomıka ósimi 3,9 paıyzdy qurady - Súleımenov
ASTANA. QazAqparat - 2017 jyldyń qańtar-qarashasynda Qazaqstannyń Іshki jalpy óniminiń ósimi 3,9 paıyzdy qurady. Bul týraly Úkimet otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.
«Aǵymdaǵy jylǵy qańtar-qarashada ınvestıtsııalyq belsendiliktiń jyldamdaýy jáne ınflıatsııalyq protsesterdiń turaqtanýy, sondaı-aq barlyq 6 bazalyq sala boıynsha jaǵdaıdyń jaqsarýynyń aıasynda ekonomıkanyń ósýi 3,9 paıyzdy qurady. Negizgi kapıtalǵa salynǵan ınvestıtsııalardyń ósý qarqyny 2016 jylmen salystyrǵanda 2,8 esege kóterilip, 5,7 paıyzǵa ósti. Jyl basynan beri jyldyq ınflıatsııanyń deńgeıi bekitilgen aralyqta, ıaǵnı 6-8 paıyz dálizinde boldy jáne qarashanyń qorytyndysy boıynsha 7,3 paıyzdy qurady.
Ekonomıkany ártaraptandyrý, Aýylónerkásiptik keshendi, kásipkerlikti jáne ınfraqurylymdy damytý, sondaı-aq jumyspen qamtýdy qamtamasyz etý boıynsha baǵdarlamalardy iske asyrýdyń nátıjesinde ekonomıkanyń barlyq salalarynda oń serpin baıqalyp otyr», - dep atap ótti mınıstr.
Onyń sózine qaraǵanda, naqty sektorda 6 bazalyq salanyń ishinde eń joǵary ósý ónerkásipte 7,3 paıyz deńgeıinde, kólikte - 4,8 paıyz jáne baılanysta 3,2 paıyz kórsetkishinde baıqalǵan.
«Aýyl sharýashylyǵynda ósý bıylǵy qańtar-qyrkúıektegi 1,9 paıyzdan 11 aıdyń qorytyndylary boıynsha 2,3 paıyzdy kórsetti. Qurylys salasynyń 2016 jylǵy joǵary ósýiniń aıasynda aǵymdaǵy jyldyń basynan beri árkelki ósý baıqalyp otyr, ol bıylǵy qańtar-qarashada 0,3 paıyzdy qurady. Ekonomıkanyń naqty sektoryndaǵy iskerlik belsendilik sabaqtas salalar úshin suranys qura otyryp qyzmet kórsetý salasynyń ósýin yntalandyrdy», - dep túsindirdi Tımýr Súleımenov.
