Bıyl qant qyzylshasy alqaby ulǵaıyp, maqta alqaby qysqarady

ASTANA. QazAqparat – Aýyl sharýashylyǵy mınıstri Erbol Qarashókeev vedomstvonyń keńeıtilgen alqa májilisinde bıylǵy egis maýsymynda qandaı daqyldarǵa basymdyq beriletinin atady, dep habarlaıdy QazAqparat tilshisi.

«Oblys ákimdikteriniń derekteri boıynsha 2023 jylǵy egis alqaptarynyń boljamdy alańy 23,2 mıllıon gektardy qurady.

Dándi jáne dándi-burshaqty daqyldardyń egis alańdaryn 171,3 myń gektarǵa jáne qant qyzylshasyn 6,7 myń gektarǵa ulǵaıtý kózdelip otyr. Sondaı-aq, kókónis jáne baqsha daqyldarynyń 10,2 myń gektarǵa artýy boljanýda», - dedi mınıstr.

Onyń aıtýynsha, bıyl kúrish pen maqtadan bólek, birneshe maıly daqyldyń alqabyn qysqartý josparlanyp otyr.

«Ylǵaldy kóp qajet etetin daqyldarǵa keletin bolsaq, bıyl maqta alańyn ótken jylmen salystyrǵanda 13,8 myń gektarǵa azaıtý josparlanyp otyr. Osynyń nátıjesinde ol 112,5 myń gektar bolady.

Úkimettiń sýdy kóp qajet etetin daqyldar alańyn azaıtý jónindegi tapsyrmasyna qaramastan, kúrish alańdarynyń kólemi ótken jylmen salystyrǵanda 9,9 myń gektarǵa ulǵaıǵan.

Osyǵan baılanysty, Qyzylorda jáne Túrkistan oblystarynyń ákimdikteri bul máseleni baqylaýda ustaýy qajet. Maıly daqyldar boıynsha da alańdy 191 myń gektarǵa azaıtý josparlanýda. Bul maqsary zyǵyr jáne qysha sııaqty daqyldar», - dedi Erbol Qarashókeev.