Bıyl qansha talapker grantqa qujat tapsyrýy múmkin – mınıstrlik boljamy

ASTANA. QazAqparat – Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti tóraǵasynyń orynbasary Nurbek Saparqojaev QazAqparat tilshisiniń saýalyna jaýap bere otyryp, bıyl qansha bala granqa qujat tapsyrýy múmkin ekenin málimdedi.

«Mınıstrliktiń jobalaýy boıynsha 135 myń bala granqa qujat tapsyrýy múmkin. Óıtkeni, bıyl osynshama talapker shekti ball jınady. Ol osy azamattardyń granttyq konkýrsqa qatysýǵa múmkindigi bar degendi bildiredi. Bilim berý baǵdarlamasy boıynsha, grantqa ótinish berýge bolatyn baly bar, biz soǵan saı qaraımyz. Degenmen ár balanyń jospary ár túrli. Biri qujat tapsyrady, endi biri tapsyrmaýy múmkin. Jalpy, búginde 135 myń talapker múmkindigi bar» - dep málim etti Nurbek Saparqojaev tilshi saýalyna jaýap bere otyryp.

Bıyl Qazaqstan boıynsha 88 myń bilim granty bólindi. Onyń ishinde 73 061 grant bakalavrıat boıynsha bilim alatyn talapkerlerge beriledi.

Aıta keteıik, erteńnen bastap Egov.kz portaly arqyly grantqa qujat qabyldaý bastalady. Nurbek Saparqojaevtyń aıtýynsha, grant ótinish berý 13-20 shilde aralyǵynda júredi.

Eske salaıyq, buǵan deıin grantqa túsýge qansha ball jetkilikti sanalatyny týraly jazyp edik.