Bıyl ınvestıtsııalyq jobalardy jeńildikpen qarjylandyrýǵa 500 mlrd teńge bólindi - Premer
Álıhan Smaıylov qazir búkil álemde tsıfrlyq tehnologııalar, robottandyrý jáne protsesterdi avtomattandyrý belsendi túrde damyp kele jatqanyn, osy oraıda qazaqstandyq kásiporyndardy jańǵyrtý mańyzdy ekenin atap ótti.
«Bıyl óńdeýshi ónerkásiptegi, onyń ishinde óndiristi jańǵyrtý boıynsha ınvestıtsııalyq jobalardy jeńildikpen qarjylandyrýǵa Qazaqstan Damý Banki men Ónerkásipti damytý qory jelisi boıynsha biz 500 mlrd teńge qarastyrdyq. Búgingi tańda 200 mlrd teńgeden astam somaǵa jobalar maquldandy. Biz bıyl bul qarjylandyrýdy 1 trln teńgege deıin ulǵaıtýdy josparlap otyrmyz, bul qazirgi jaǵdaıda aıtarlyqtaı qoldaý bolmaq», — dedi Álıhan Smaıylov.
Úkimet basshysy «Bıznestiń jol kartasy» jáne «Qarapaıym zattar ekonomıkasy» baǵdarlamalary aıasynda búginde paıyzdyq mólsherlemeler sýbsıdııalanyp, bank nesıeleri boıynsha kepildikter berilip otyrǵanyn aıtty. Sonymen qatar memlekettik qoldaýlar sheńberinde ınfraqurylym qurylysyna qarjy bólinýde.
«Bıyl biz óńdeýshi ónerkásipte jalpy quny shamamen 520 mlrd teńge bolatyn 12 myńnan astam shaǵyn jáne orta bıznes jobasyn sýbsıdııalaýdy josparlap otyrmyz. 400 mlrd teńgege taǵy 12 myńǵa jýyq jobaǵa kepildik berý josparlanyp otyr», — dedi Premer-Mınıstr.
Úkimet basshysynyń aıtýynsha, qazir «Bıznestiń jol kartasy» baǵdarlamasynda shaǵyn mashına jasaý kompanııalary úshin «Óndiris» baǵdarlamasyn bólip alyp qaraý máselesi qosymsha pysyqtalyp jatyr. Atalǵan baǵdarlama kompanııalarǵa óz ınvestıtsııalaryna jáne óndiristi jańǵyrtýǵa qarajat alýǵa múmkindik beredi.
«Sonymen qatar bıýdjet qarajaty esebinen shaǵyn bızneske daıyn óndiris oryndary usynylyp, jumysty bastaý úshin shaǵyn ónerkásip aımaqtarynyń qurylysy qarjylandyrylatyn bolady. Bul baǵdarlamany biz barlyq óńirde júrgizemiz», — dedi Álıhan Smaıylov.
Budan basqa qazirgi ýaqytta respýblıkada ónerkásiptik qurastyrý týraly kelisim qoldanylady, oǵan sáıkes aýyl sharýashylyǵy tehnıkasy men avtomobılder óndirýshileri kedendik bajdan jáne QQS-tan bosatylady. Úkimet bul sharany turmystyq tehnıka óndirýshilerine 5 jyl merzimge keńeıtý máselesin pysyqtaýda.
Osy oraıda búginde salyq boıynsha yntalandyrýdyń tıimdi sharasy – esepke alý ádisimen QQS tóleý tetigi jumys isteıdi. Onyń arqasynda jabdyqtar men quramdas bólshekterdi ımporttaıtyn mashına jasaý kásiporyndaryna salyq júktemesi azaıady.
«Bul óndiristiń ózindik qunyn tómendetedi. Buryn bul norma 4 taýar tobyna qatysty qoldanylǵan. Qazir biz ony 10 taýar tobyna deıin keńeıttik. Ol 2024 jyldyń sońyna deıin jaramdy. Qazir jańa Salyq kodeksi aıasynda biz osy sharanyń qoldanylý merzimin uzartý múmkindigin qarastyryp jatyrmyz», — dedi Álıhan Smaıylov.
Sonymen qatar Úkimet basshysy Qazaqstanda tsıfrlyq tehnologııalardy engizýge, baǵdarlamalyq qamtamasyz etýdi satyp alýǵa jáne óndiristi jańǵyrtý úshin sheteldik mamandardy tartýǵa jumsalǵan shyǵyndardyń 40%-na deıin óteletinin eske saldy.
Oǵan qosa qazirgi ýaqytta jańa Mashına jasaýdy damytýdyń keshendi josparyn ázirleý aıaqtaldy. Onyń aıasynda mashına jasaýdy qosa alǵanda, óńdeýshi ónerkásipti qoldaýdyń birqatar naqty sharasy qarastyrylǵan. Mysaly, ǵylymı-zertteý jáne tájirıbelik-konstrýktorlyq jumystarǵa shegeriletin shyǵyndardy 1,5 ese ulǵaıtý josparlanyp otyr. Bul kásiporyndardy ınnovatsııany ázirlep, ony engizýge qarajat salýǵa yntalandyrmaq.
Budan basqa mashına jasaý salasynyń synaq zerthanalary úshin jabdyqtardy satyp alý jáne qyzmetkerlerdi sheteldik kásiporyndarda taǵylymdamadan ótkizý sharalaryn qarjylandyrý máseleleri pysyqtalyp jatyr. Sonymen qatar taǵy bir tyń shara – mashına jasaý kásiporyndary úshin ónerkásiptik granttar engizilýde.
«Jalpy otandyq mashına jasaý salasy jaqsy qarqynmen damyp keledi. Biz óńdeýshi ónerkásiptiń lokomotıvi sanalatyn osy salany odan ári barynsha qoldaýǵa daıynbyz», — dep túıindedi Premer-Mınıstr.
