Bıyl ınternetten radıkaldy baǵyttaǵy 11 myńnan astam zańsyz materıal joıyldy
«Mınıstrliktiń din salasyndaǵy jumysynyń negizgi strategııalyq baǵyttary memleket damýynyń zaıyrly qaǵıdattaryn nyǵaıtýǵa, úılesimdi memlekettik-konfessııalyq qatynastardy qamtamasyz etýge jáne qoǵamda radıkaldy ıdeologııanyń taralýyna jol bermeýge baǵyttalǵan. Atalǵan strategııalyq baǵyttardyń negizindegi din salasyndaǵy jumys ataýly aqparattyq-túsindirý, ınternet keńistikte dinı ekstremızmge qarsy nasıhattaý, sondaı-aq ońaltý jáne deradıkalızatsııalaý jumystary negizinde iske asyrylýda», - dep atap ótedi Aqparat jáne qoǵamdyq damý mınıstrliginen agenttiktiń resmı saýalyna bergen jaýabynda.
Vedomstvo halyqtyń dintanýlyq saýattylyǵyn arttyrý, din salasyndaǵy memlekettik saıasattyń basymdyqtaryn túsindirý, dinı ekstremızmniń aldyn alý jáne radıkaldy dinı ıdeologııalarǵa qarsy ımmýnıtetti qalyptastyrý maqsatynda is-sharalar qabyldanǵanyn atap ótedi. Búginde bul jumystar quramynda 3 028 adam bar din máseleleri boıynsha 228 óńirlik aqparattyq-túsindirý toptarynyń kúshimen uıymdastyrylady.
«2023 jyldyń birinshi jartyjyldyǵynda 700 myńǵa jýyq adamdy qamtı otyryp, 17 500 aqparattyq-túsindirý is-shara uıymdastyryldy. Radıkaldy dinı aǵymdar ıdeologııasy negizinen ınternet resýrstar arqyly taralatyny belgili. Mınıstrlik ınternet keńistikte dinı ekstremızmge qarsy nasıhat júrgizý boıynsha jumystar júrgizýde. 2023 jyly radıkaldy baǵyttaǵy 11 myńnan astam zańsyz materıal joıyldy jáne buǵattaldy. Radıkaldy dinı toptardyń ishinen áleýmettik jeliler arqyly 14 myńnan astam adam shyǵaryldy», - dep naqtylaıdy vedomstvodan.
Mınıstrliktiń dereginshe, ońaltý jumysyna destrýktıvti dinı aǵym ıdeologııalaryn nasıhattaýǵa qarsy tura alatyn jáne azamattardy dástúrli ıslam prıntsıpterine jáne qazaqstandyq qoǵamnyń qundylyqtaryna beıimdeıtin joǵary bilikti teologtary men psıhologtar, sondaı-aq Qazaqstan musylmandar dinı basqarmasynyń resýrstary tartylǵan. Jalpy, túsindirý jumystarynyń nátıjeleri boıynsha dinı ekstremızm ıdeologııasyn ustanatyn adamdar sanynyń azaıýy baıqalady. Elimizde radıkaldy jáne ekstremıstik kózqarastar men ıdeıalardy qabyldamaý ahýaly qalyptasqan.
